Nilai zing khan NBA In-Season Tournament khelh chhunzawm a ni a, Miami Heat hnehtu Milwuake Bucks in quarter-final an lut. Inkhel dangah Sacramento Kings in harsa takin hnehna an chang a, quarter-final an lut ve bawk.
Miwuake Bucks hian Miami Heat lakah bul an tan tha a, quarter khatnaah point kua zetin chungnung zawkah an tang nghal. Quarter hnihnaah erawh Heat an khel tha ta viau thung a, point 12 in Heat an chungnung ve thung a, point thuma chungnung zawk chungin Heat in chawlhlawk an hmang.t
Chawlhlawk hnu lamah Bucks an khel tha zui viau a, quarter hnuhnung pahnihah chungnung zawk ni ve vein an khingpuite hi point 131-124 in an hneh a, NBA In-Season Tournament hmasa berah quarter-final an lut. Miami Heat an hneh tum hian Bucks player pawimawh Giannis Antetokounmpo a khel tha viau a, point 33 zet a thawkchhuak. Bucks tan hian Damian Lillard chuan point 32 a thawkchhuak ve bawk. Bucks hian quarter-final-ah New York Knicks a hmachhawn zui leh ang.
Milwuake Bucks hmachhawn tur New York Knicks hian nilaini zinga an khingpui Charlotte Hornets chu point 115-91 in an hneh a, Group B atangin an tlang theih phah. Group C lama inkhel dangah Boston Celtics chuan point 124-97 in Chicago Bulls an hneh a, group C champion ni chungin quarter-final an lut ve bawk.
Thawhleh zinga Group match hnuhnung ah Sacramento Kings leh Golden State Warriors te an inhnehtawk hle. Inkhel hmuhnawm takah Kings hian point 124-123 in Golden State Warriors an hneh thei hram a, quarter-final an lut zui ta bawk.
NBA In-Season Tournament hmasa berah hian Western Conference atangin Los Angeles Lakers, Phoenix Suns, Sacramento Kings leh New Orleans Pelicans ten quarter-final an lut a. Anni pali hian semi-final luh an inchuh ang a. Eastern Conference atangin Milwaukee Bucks, New York Knicks, Indiana Pacers leh Boston Celtics ten quarter-final an lut ve bawk.
Tarlan tawh thin angin NBA In-Season Tournament hi a vawikhat nan kum 2023 hian buatsaih a ni a. Inelna hmasa bera champion in hnuhma tha tak an hnutchhiah thei dawn a, champion tuma inelna boruak a lian viau bawk. NBA In-Season Tournament ah hian NBA team te group hrang hrangah inthenin an inel kual a. Group champion leh pahnihna in quarter-final an lut. Quarter-final hi December ni 4 leh 5-ah khelh a ni ang a. December ni 7-ah semi-final khelh a ni ang a. Final hi December ni 9 khian Las Vegas ah khelh a ni ang.
Bucks in quarter-final an lut
