Budget chhiarkawp dik phochhuah kan tum ang – Lalduhoma

Budget chhiarkawp dik phochhuah kan tum ang – Lalduhoma
ZPM a sawrkar chuan langtlang budget chhiarkawp dik phochhuah an tum dawn tih ZPM leader Lalduhoma chuan a sawi.
Ningani khan ZPM party hian 2023 inthlanpui atan campaign an khuhhawng a. An party president Lalliansawta’n a khuhhawng. ZPM chief ministerial candidate Lalduhoma chuan kalphung thar budget an pharh ve thei a nih chuan, Zoram mipui hnenah langtlang budget chhiarkawp dik phochhuah an tum dawn tih hi a sawi.
“Tuna kan kalphungah chuan Budget Session kan nei a, budget kan pass a; mipui kan bum a, keimahni pawh kan inbum a ni. Kan GSDP kan chhut sang lui a, a tak takin kan thleng pha ngai lo. Chu chuan kan leibat te, kan sum indaih lohna te a ti tlahniam a, a ti langmawi a, a langa mawi zawngin chhiarkawp diklo Budget Session apiang hian kan inhlui thin. ZPM a sawrkar chuan kan nihna diktak hi zahpui loin, kumtir atangin kan bat zat tur te, kan sum indaih lohna tur te mipui nen kan hriat vek turin kan pholang thin dawn a ni,” a ti. Mizoram budget pass takah khan kumina kan bat ngai tura chhut chu cheng vaibelchhe 13584 niin, puk belh tura dah chu vbch. 2479 a ni a. Kan budget dinhmun hi kumtinin, sum min petu leh kan sum dinhmun kawltu kan batzat engkim chhinchhiahtu RBI-in statement a chhuah thin a, he statement-ah hian a zawnin India ram state a leiba nei tam ber kan ni mek tih ZPM hruaitu hian a sawi.
Sawrkar sum puk chu loh theih lohin kumtin kan rulh a ngai a, kumina kan rulh tur chu vbch. 1442 a ni a, a pung rulh tel tur vbch.662 niin a sawi. “Kumina kan leibat rulh tur zat hi Mizoramin sum kan lakluh ve aiin vbch. 123 in a tam zawk a. Thildanga kan hman tur ni lo, hmasawnna atan bika sawrkarin sum a ruahman, capital outlay aiin leiba kan rulhna tur hi vbch. 408 in a tam zawk. Kumkhata hmasawnna atana sum kan dah theih zat aia leiba kan rulh vbch. 400 chuanga a tam tawh chuan, dinhmun a tha lo hle tihna a ni,” a ti.
Health care-ah bill la pek loh chhungkua 13635 hnenah cheng nuai 6289 batsak mek a ni tih Lalduhoma hian a sawi a. Health department-ah hian contractor leh supplier hnena leibat nuai 1974 a awm mek thu te, power man bat nuai 12401 a nih thu te, PWD-ah contractor bill ba nuai 21967 a awm mek thu te sawiin, “Hma kan sawn dan, kumtina kan thanna hi an teh thin a, tun dinhmuna kan than dan hi -9.6% a ni. Chumi awmzia chu kan thang miah loa, a hnungtawlh zawngin step 9 naah kan awm mek tihna a ni. Heng zawng zawng chingfel tur hian mahni inpekna nen Pathian rinchhana kan beih a ngai dawn a ni,” a ti.
Hetiang hi state sum dinhmun a nih avangin sawrkarin mipui hnenah thutiam lawmawm tak tak tiam thin mah se, a hlawhtling thei lo tih a sawi a. “Kan tlin leh si loh leh kan tih leh theih tur si loh hi kan sawiin kan zuar ve tur a ni loa, he sum harsatna lian tak min hmuaktu hi kumkhat chhung emaw chuan ziaawm taka kan kal chhoh pui theih kan beisei a, restricted tender ringawt pawh kan tih ve loh hian kan sum dinhmun chu chuan nasa taka a siamthat hman kan beisei a ni,” ZPM CM candidate hian a ti.
Hetiang zat leiba chhawm tur a awm chung hian, an sawrkar kumkhatna atangin kuthnathawktute an tuam hlawm nghal dawn tih a sawi a. Thlai thar pali an lei tur leh a rate nen an puan tawh bakah buhhum an lei dan tur te, kuhva, sangha, rubber plantation, alu leh thildang chu thlai pali anga a rate siamsaa puan lawk ang em ni lo mah se, vegetable supply chain nen contract farming-a kalpui chhoh an tum thu te a sawi a ni.
ZPM campaign khuhhawnnaah hian an party-ah mithar an lawmlut a, an zingah hian Congress sawrkara minister leh parliamentary secretary lo ni tawh, tunhnaia Congress party atanga bang KS Thanga a tel a ni.