Mizoramin kum khat chhunga sum hman tur a ruahman budget estimate 2026-27 chu kar kal ta February ni 26 khan pharh niin nimin March ni 2 atang khan general discussion neih tan a ni ta a. General discussion hi vawiinah chhunzawm a ni ang a, naktuk atangin department hrang hrang demand te sawi tan a ni leh ang a.
Tarlan tawh angin, Mizoram budget estimate 2026-27 hi kum hmasa aiin a size lian hret mah se, sum hmanral dan turah hmasawnna liantham a awm hran lo niin a lang. Sawrkar hnathawk leh sawrkar inrelbawlna thilah budget pumpui atanga 82.54% chu revenue expenditure atan dah a ni a; hmasawnna hnathawhna atan 17.46% chu capital expenditure atan dah a ni a.
Tunhmaa sawrkar dangin an tih ngai loh, tun sawrkara kan hmuh, thil thar, hmasawnna liantham deuh chu thlai thar leina tur a hranpaa budget-a dah tak hi a ni a, chu chu cheng vaibelchhe 150 a ni. Hei hi Revenue Expenditure atana serh hran cheng vaibelchhe 2981 (17.46% of total budget) atanga 5% a ni.
Sawrkar thar hian term khat chhung atan budget vawithum an pharh ta a, vawihnih dang budget pharh tur an la nei a, thlai chingtute thlai leina tur serh hran hian eng angin nge hma a sawn ve theih dawn tih chu mipui thlir ber tur pakhat a ni ang.
Hei bakah hian, September ni 3, 2024 atanga Road Maintenance Cess leh Social Infrastructure & Services Cess, Petrol litre khatah cheng 2 ve ve leh Diesel litre khatah cheng 2 ve ve lak chu tunhmaa awm ngai lo a ni a. Tun tumah hian heng thil pahnih atanga Cess lak tlingkhawm hi cheng vbch 45 ve ve a ni a. A bikin, mipui bengverh, kawngpui siam nan cheng vaibelchhe 43.25 hman a ni dawn a, Cess hmuh zawng zawng kawngpui siam nana hman a nih loh chhan hi 2024-25 chhunga hmuhin kum 2025-26-a sum ruahman a daihlohna Cheng Vbc 1.75 siam rem a ngaih vang niin budget pharhtu chief minister chuan a lo sawi tawh a nih kha. Hei hi mipui mit fukna ber pakhat a nih a rinawm a. Petrol leh diesel leituten litre khat an lei apiangin cheng 4 (cheng 2 ve ve) an thawh ve ziah tihna a ni a. “Kawngpui a that phah em?” tih chu tehna tur a nih hmel.
Naktuk atangin Demand sawi ho a ni leh dawn a. Legislator zingah, budget demand aia mahni demand tuipui zawk tlat an awm thin ang kha, tun tumah hian hmuh tur an la awm zel dawn em tih chu mipuiin an bengkhawn tur zinga pakhat a ni leh dawn a. Demand sawihona hun hi mipuiin an bialtu MLA theuhte quality teh nan hmang thin sela, kan leigislator-te quality pawh hi a sang chho ve zelin a rinawm.
Budget discussion
