Nakuma budget pharh hma ngeiin sawrkarin lei a tum tual buh thar an leisakna zat tur chu puan hman tum a ni tih Agriculture minister PC Vanlalruata chuan a sawi.
Ningania Agriculture department-in hmalakna thlirlet leh hmalak zel dan tura inrawnkhawm an buatsaih a hmanpuinaah minister chuan kum tam tak chhung thar tam lam tinzawn (production base) ringawtin department a kal a, tunah chuan tharchhuah hralhna lam tinzawn (market base) a kalpui tum a ni tih a sawi a. “Market first tia kal a hun tawh,” a ti.
Sawrkarin a hralhna tur lam ngaipawimawhin sawhthing, aieng, hmarcha leh hmunphiah hralhna tur sum a dah a, rate mumal tak a duang tih sawiin, “Nakum budget pharh hma ngeiin buhfai rate siama loneitute tana puanzar hman tum a ni a. Tung pawh sawrkarin a ngaipawimawh dawn,” PC Vanlalruata hian a ti.
Tunhnaiah sawrkar laipui hotute agriculture tihhmasawn nana dawr a nih thu sawiin, buh leh thlai tam zawk thar theihna hmun (potential area) cheibawl bakah farm mechanisation ngaihpawimawh tum a ni tih a sawi a ni.
Agriculture secretary Dr H Lianzela chuan buh leh thlai tharchhuah tipung turin loneitute hnena let leh a ngai, tiin, technology thar, zirbingna, soil quality tih that leh land holding siamthat, tuilakna leh inrelbawlna siamthat, agriculture infrastructure tihchangtlun, agriculture credit leh crop insurance tih chak leh buh leh thlai tharchhuah hralhna tur market dap kawnga tan lak chu hmasawn zel tura ngaihpawimawh hmasaka neih a tul tih a sawi.
Budget pharh hma in tual buh thar rate tur puan hman tum
