Budget pharh, hmasawnna ruhrel dinna tur sum ruahman tam

Budget pharh, hmasawnna ruhrel dinna tur sum ruahman tam
Indian Finance Minister Nirmala Sitharaman-i chuan Pathianni khan 2026-27 tangka kum chhunga sum hman tur leh lak luhna tur ruahmanna, budget a pharh a. Khawvel puma sumdawnna chingchingvet tak karah hmasawnna ruhrel lian dinna atana sum tam tak hman tura tih niin tual chhunga thil siam chhuah hlawk zawkna tur thil tam tak duan a ni bawk.
India hian kumin tangka kum kal mekah hian a sum thawh chhuah zawng zawng, gross domestic product (GDP) chu 7.4%-a than a beisei tih Economic Survey pharh tawhah a tar lang a, hetih lai hian kum tharah erawh US President Donald Trump-a’n chhiah 50% a laksak avangin thanna hi tlahniam hret tura chhut lawk a ni.
Budget hi kum khat chhunga ram eibar dinhmun leh eizawnna nghawng a ni a, kum tharah hian sum hman leh thawh chhuah inthlauhna zau thin chu tihzim tum a ni.
Hmansawnna ruhrel lian – kawngpui sial, lawngchawlhna siam leh relkawng siam te hi Narendra Modi-a sorkarah kum 10 liam ta chhung khan ngaih pawimawh a hlawh viau tawh a, tun budget pharh takah pawh hian heng thovah hian huang zauh tum leh a ni.
April 1 atanga hman tan tur budget-ah hian hmasawnna hna thawhna tura sum dah chu kum kal mek aia 9%-a tamin Rs. vaibelchhe nuai 12.2 dah leh niin kum kal mekah Rs. vaibelchhe nuai 11.1 dah a ni.
Ram venhimna lamah pawh sum dah belh niin khawvela indona thawm a tam em laiin kum kal meka sum ruahman aia 20% chuang maha tam kum tharah dah a ni.
Sorkar chuan mi mal investment an tam loh leh ram dang atanga sum thawhtu an kiam mek laiin semiconductor, data centre, textile leh leilung hausakna vâng chi telin thil pawimawh bik siam chhuahna chi sarihah hma thar lak nasat a tum hle bawk tih budget-ah hian a lang.
Sitharaman-i chuan state pali, chhim lama Tamil Nadu, Kerala leh Andhra Pradesh leh khawchhak lama Odisha-ah ram leilung hausakna thil vâng chi lak chhuahna tur corridor siam a ni dawn tih a sawi a. November thla maiah khan India hian Rs. tluklehdingawn 73 senna tur rare earths scheme a lo tlangzarh tawh nghe nghe.
Budget-ah hian second semiconductor tam zawk siam chhuahna turin $ maktaduai 436 dah a ni a, heng thil hi hmanrua leh bungrua bakah artificial intelligence kaihhnawih thil atana tih a ni.
India hian ram dang atanga data centre atana sum thawh thei leh vantlang hnena cloud service pe theite atangin kum 2047 thleng chhiah laksak loh turin a ti dawn baw a. India hian ram dang hmun hrang hrang atangin data centre investment-ah sum tluklehdingawn tel thawhtu a hmu a, nikum pawh khan Google chuan chhim lama hmunhma an siam nan $ tluklehdingawn 15 an ruahman a ni.
Budget pharh takah hian hnathawktu mamawh tam, textiles kaihhnawiha thawh chhuah a tam zawk theih nan mega-textiles park lian tak siam thar tum a ni a. Hei hian ram dang atanga dawrtu a him ngei beisei niin kar hmasa maia India-EU free trade agreement siam nen pawh inzula ngaih a ni.
US-in chhiah a laksak tam avanga thil thawn chhuah lamah thanna a muan mek laiin India hian industry eng emaw zat thil siam chhuahah chhiah lak loh a tum bawk a. Heng zingah hian ram danga a thawn chhuah tam ber zinga mi, tui lam sa pawh a tel a. Lithium-ion battery siamna tur kaihhnawih thilah pawh chhiah hi awl a tum bawk.
Mi mal hnen atanga chhiah lak dan a kalpui sa erawh tihdanglam tumna a awm lo va. Modi-a sorkar hian nikum khan income tax lak dan bi thar kalpuiin kum khata Rs. maktaduai 1.2 la lut tling lo chin chu a awl a, hetiang hi kalpui zui tur a ni dawn a. Goods & services tax (GST) erawh tlem a tidanglam thung.
April, 2026 atang chuan sorkar hian sum thawh chhuah leh lak luh inthlauhna tihzim tumin hma a la dawn a, kum 2030-31-ah chuan thawh chhuah 56% leh hman ral 50% nihtir a tum dawn a, hemi tur hian sum hmanna chu awmze nei taka a kalpui a ngai dawn niin mi thiamte chuan an sawi.