Tun hnai kum thum chhungin Mizoram sorkarin buhfai lei nan sum a seng hnem telh telh a, kum thum chhung hian senso hi nuai 7500 chuangin a pung.
Budget Session liam taah khan Lawngtlai West bialtu C Ngunlianchunga zawhna, ziaka chhan chi chhangin supply minister B Lalchhanzova’n tun hnai kum thum chhunga buhfai leina senso zat hi House a hrilh a ni.
Minister sawi danin, 2022-23 khan buhfai lei nan cheng nuai 10,759.75 sen a ni a, 2023-24-ah cheng nuai 17,558.58, 2024-25-ah cheng nuai 18,295.45 sen a ni.
2022-23-a senso aia 2024-25-a senso a tamna hi cheng nuai 7535.7 a ni.
Chawhrualin buhfai lei nan thla tin cheng nuai 1304.80 sen a ni a, thla tina pawisa hmuh let zat hi chawhrualin cheng nuai 1217.16 niin, subsidy atana thla tina sen ral zat chu cheng nuai 87.64 a ni, minister chuan a ti.
Buhfai hi supplier-te’n quintal-ah Rs 3590-in an supply a, Grade A buhfai hi ration atan sem chhuah a la ni em tih zawhna chu minister hian, “Ni tawh hran lo,” tiin a chhang a ni.
Tuirial bialtu K Laldawngliana zawhna chhangin minister hian 2025-26 (January thleng) chhunga buhfai supply-tute a sawi a, a sawi danin, MIFCO Ltd-in quintal 1,36,652.74 an supply a, LZ Juice-in quintal 1,15,605.00, SR Auto (NCCF) te’n quintal 49,714.46, NAFED-in quintal 4894.18, MAMCO Ltd-in quintal 99.68 an supply a ni.
Buhfai leina senso
Kum Senso
2022-23 Cheng nuai 10,759.75
2023-24 Cheng nuai 17,558.58
2024-25 Cheng nuai 18,295.45
Buhfai lei nan seng hnem telh telh
