Food, Civil Supplies & Consumers Affairs changtu minister chuan buhfai supply chungchanga hmalakna thar kalpui dan tur chu nimin khan press mite hmaah a puangzar a. He hmalakna thar hi kalpui a nih chuan Mizoram sawrkar hian thla tin cheng vaibelchhe 5.2 a hum thei dawn a; kum khatah chuan cheng vaibelchhe 63.1 a tling thei dawn a ni, minister chuan a ti.
Hei bakah hian, Retailer te hlawh pawh buhfai Kg khatah Rs. 0.50 ni thin kha Rs 1.50 ah tihpun a ni dawn a. Mipuiin buhfai buk tling zawk an dawng thei tawh bawk ang a; tunhmaa mi pawimawh heng – CM, MLA leh Group A Officer-te tana buhfai quota lei thin pawh tihtawp a ni tawh dawn bawk a ni. Hmalakna thar hnuaiah hian thildang pawh her danglam a awm nual bawk.
Tuna hmalakna thar kalpui tur hi Mizoram budget estimate 2024-25 siam tawh hnua puanzar chauh a nih avang hian, budget estimate-ah khan kalphung hlui angin senso zat tur hi chu la chhut a nih a rinawm a. Civil Supplies hi development expenditure hnuaia economic services sector-ah rin luh niin he sector atan hian budget pumpui atanga chhuta 22.76% dah a ni a; civil supplies hian kum khat chhunga senso tura chhut cheng vaibelchhe 63.1 chu ‘a ngai leh lo e’ a ti dawn ta a nih hmel ta a ni.
Senso tura chhut fel diam tawh cheng vaibelchhe 63.1 hi ‘a ngai leh ta lo e’ tih a nih chuan, engtia hman tangkai tur nge ni ta ang tih hi mipui zawhna tur a nih a rinawm a. Hetia han ngaih thuak hi chuan, Retailer-te hlawh tihpunna hi budget estimate-ah khan a tel hman lo ve thung dawn a, tuna vbch 63.1 atang hian sawh hek theih a ni ang a, a bang chu eng tin zel? tih zawhna hian a la umzui zel dawn niin a lang. Mipui ngaihdanah chuan, ‘cheng heti zat kan hum thei a nih chuan, estimate-a tel lo eng ber emaw hmasawnna ruhrel tha tak din theihna tur a ni ang chu…’ an tih a rinawm.
Tun sawrkar thar hian ‘langtlang sawrkar’ nih an duh a, an tum a, sawrkarna fawng chelh hlim atangin an bei nghal chat a, tun hi kan thleng a ni a. Hun rei lo te chhung chauh an la sawrkar a ni a, a chang hi chuan tawngkam an duhthawh mah mah em ni chu aw tihturin an awm a, an tawng hi an um pha leh si lo mai ang em tih te pawh a hlauhawm rum rum a. Eng pawh ni se, intawng bat te hi fuat min petu, tha tichaktu a nih ve miau si avangin, ‘tawng tlem la, thawk tam rawh’ tih hrulah, ‘tawng tam chungin a thawh tam theih tho’ a la tih theih a ni.
Buhfai man vbch 5 hum thei dawn… eng tin zel?
