Buhtun ei leh ching uar turin inzirtir
North-Eastern Regional Agriculture Marketing Corporation (NERAMAC) leh sawrkar laipui Ministry of Agriculture & Farmers Welfare buatsaih India rama buhtun chawikanna programme, ni hnih awh tur chu Thawhlehni khan Aizawlah neih tan a ni.
He programme tum ber chu, buhtun (millets) chu chaw hrisel leh tha a nih avangin mipuiin kan ei tam a pawimawh tih inzirtir a, inhrilh tam a ni.
A hawngtu Agriculture & Farmers Welfare minister PC Vanlalruata chuan, tunhma in loa buh karah buhtun hi chin thin a ni a. Tunah buhtun ching uar tura NERAMAC hmalakna chu lawmawm a tih thu a sawi. Mizoten hriselna kawngah hma kan sawnpui ngei a rin thu sawiin, a bikin zunthlum natna neiten an hlawkpui a beisei tih a sawi a ni.
Agriculture director Ramdinliani chuan buhtun chu thlai fei tak, sik leh sa ngam tak, chin awlsam si, chaw tha em em a nih avangin Mizoramah kan uar lehzual a ngai tih a sawi a. Tunhma chuan Mizoin buhtun hi chaw nen chhum kawpin kan ei thin a, tunlai thangtharten kan ei tam ta lo chu a veiawm, tiin, amah hlutna awm chu hmang tangkai uar a, buhtun hmanga siam ei tam turin a chah
Buhtun sawngbawl lama hma la duh entrepreneur tan pawh India sawrkar a inhawng hle tih a sawi bawk.
NERAMAC managing director Commodore Rajiv Ashok (Rtd) chuan buhtunah hian ei tur tha – protein, fibre leh Glycemic index a hniam avangin zunthlum nei tan a tha a. Buhtun chin hi a awlsamin tui a mamawh tlem hle tih a sawi a ni.
Programme hman zawh hian buhtun atanga ei tur siam chi hrang hrang phochhuahna stall 12 hawn chu minister hian hawng zui nghal a, mipui a duh apiang tana en leh lei theiha chhawp a ni. Vawiin – October 23 hian mipui tan chawhnu dar 2 thleng stall hawn chhunzawm a ni anga, B2B (Business to Business) session neih a ni bawk ang.
Buhtun ei leh ching uar turin inzirtir
