Buichali leh Khamrang hnawh zo
Kawnpui- Khamrang khawih mek
Kolasib district paltlangtu National Highway 306/06 siamthat hna thawh tumnaah Kolasib bialtu MLA, Assembly deputy speaker Lalfamkima kaihhruaiin thutkhawm a ni a. District thuneitute NHIDCL hotute leh an hnuaia contractor-te an tel.
Deputy speaker chuan fur ruah tui a zawh tawh avangin hna thawh tan theih a ni tawh, tiin NHIDCL leh contractor-te an inbuatsaih dan a zawt a. NHIDCL hotute chuan an hmalakna hrang hrang hrilhin, Buichali atanga Khamrang kawng chhe zual lai siam an zo hnai tawh a, Kawnpui leh Khamrang khawih chhunzawm mek a ni tih an sawi. Kolasib atanga Kawnpui inkar siamthat leh tur niin, tunah hian side drain siam mek a ni tih an sawi a ni.
Black topping hna thawh tur chungchangah contractor-ten repairing hna an tih hmasa phawt dawn a, Kolasib leh Bilkhawthlir inkar black topping hi November thla chawhnu lam atanga tan tum a ni tih an sawi. Hnathawhna atana mamawh hot mix plant chu Mizoram a lo la thleng lo tih sawiin, tunah hian kawngpui khu lutuk ti ziaawm turin tui an phuh tan a, nikhatah vawi hnih phuh tura tih ni mah se, tui harsat avangin an tihlawhtling thei rih lo tih an sawi.
He kawngpui siam hna hi Kolasib district chhungah contractor pathumin an thawk a. Vairengte atanga Bilkhawthlir leh Kolasib- Kawnpui inkar chu Balaji Company-in an khawih a; Bilkhawthlir -Kolasib leh Kawnpui- Khamrang inkar chu J. Infratech-in khawihin, Khamrang atanga Buichali chu BR Goyal Infrastructure enkawl a ni thung.
NHIDCL hotute leh contractor-te chuan harsatna an tawh an sawi a. Kolasib khawchhung, Rengtekawn thlengin kawngpui area nek an tam a, heng hian side drain a hnawh avangin kawngpuiah tuihawk a luang thin a, kawng a chhe hma niin an sawi. Hemi chungchangah hian hma lakpui turin deputy speaker hi an ngen. Hemi bawhzui hian district magistrate kaihhruaiin Police, Revenue, Sub-Hqrs YMA, NHIDCL leh contractor-te telin tunkar hian enfiah nise, an ti.
Hei bakah hian Kolasib khawpui chhung, Diakkawn leh hmun engemawzat chu bialtu MLA ruahman angin pavement quality concrete (PQC) a siam tum a nih thu leh, hemi atan hian NHIDCL Headquarter-ah proposal siam tum a nih thu an sawi tel bawk.
Buichali leh Khamrang hnawh zo Kawnpui- Khamrang khawih mek
