Bûkna dik lo hi Lalpa mit hmuhin thil tenawm a ni a, Khîn dik chiah erawh chu a lâwm zâwng a ni. (Thufingte 11:1)
Kar kalta Inrinni zing khan Mizoram Consumers Union, Hqrs; Legal Metrology Dept leh Dawrpui Local Council ten Israel Point bulah, mipuiin an thil lei a buk a dik leh dik loh an endik theihna tur ‘Bukna Dik’ an hung chhuak a. He Bukna Dik pantute zingah hian an thil lei a buk a tling lo tih hriatchhuahsak engemaw zat an awm a, hei hi chinfelsak an ni hlawm a.
Bukna dik lo kan buaipuina hi a rei ve ta hle. Kan hriat angin iron rod buk tling lo te, cement buk tling lo leh quality tha lote, sa buk dik lo te, buhfai buk dik lo te, a tam mai; man chhuah a ni thin a. Sawrkar leh NGO ten an buaipui luih luih reng a ni ber!
Heti taka thil dik lo haichhuah a ni tawh chung leh awareness campaign pawh ngawrh taka kalpui a ni tawh chung hian, ‘bukna dik lo’ hi a reh hlei thei lo chu a ni ber mai a. Thuneitute leh a kaihhnawiha hmalatute pawhin thahnem an ngai a, hah lah an hah. Tunhma ngaihtuah chuan hma kan sawn viau tawh a, mahse hmalakna tur erawh a la awm zel.
Hetiang thilah hian thuneitute an pawimawh rual rualin mipui pawimawhna pawh hi a nep lo hle. Thuneitute chuan mipui hmakhua ngaiin dik taka dan zawm a nih theih nan hma an la a, a hamthatna dawngtu tur ber mipui lam (consumer) te hian thuneitute hmalakna kan thawhpui that loh chuan, thuneitu/dan kengkawhtute hi eng ang pawhin thawk rim mah se, awmzia a nei tak tak thei lo. Mipui lam hian kan thil lei buk a dik leh dik loh hi ngaihven zui peihin, bukna dik lo hmangtu thil zuartute hi chachhuahin report zat zat peih ila, thil zuartute hian bukna dik lo hi an hmang reng ngam bik hauh lovang.
Tuna bazar bula ‘bukna dik’ hung chhuak chunga hmalakna ang hi, bazar tinah hian thla hnih khat vel kalpui ni thei se, khawpuiah chauh lo pawh, thingtlang khaw lamah pawh sawrkar leh NGO lam thawhhona hnuaiah kalpui theih ni se, a sawt viauin a rinawm. Tun laia bazara thil zuartuten, mau théi chhunga thir spring rawlh luta bukna (spring balance) an uar thar ta riau mai te leh, buk lung dik tak hmang lova, thil fun emaw, lungtum emaw buk lung atana hmang an awm thinte pawh hi endik leh theih ni se, chu chuan awmzia thui tak a nei bawkin a rinawm.
Bukna dik lo leh mipui
