Bul tan nuamsa Sindhu

Bul tan nuamsa Sindhu
BWF World Championships women’s singles first round match-ah two-time Olympic medallist PV Sindhu chuan Thawhtanni zan khan nuamsain Ireland nula Sophia Noble lakah straight games hnehna (21-7, 21-11) a chang a, a vawi rukna atana he badminton tournament lian medal a beisei leh mekna kawngah bul a tan fuh phawt.
Indian shuttler hian tuntuma semi-final chin tal a thlen leh chuan a chhe berah bronze a awrh thei dawn a, chuti a nih chuan World Championships medal paruk awrh thei hmasaber a ni ang.
Tunhma lama seeded ninth Sindhu World Championships medal panga lo awrh tawhte chu bronze medal pahnih leh silver medal pahnih tho bakah kum 2019-a gold a awrh kha niin, mahni kawtkai ngeia tournament khelh kum hian a tum hnihna atan world champion nih leh a tum ruh hle tura ngaih a ni!
Sindhu bakahhian World Championships medal panga awrh tawh player dang pahnih awmin, pakhat zawk Chinese Lin Dan chuan men’s singles gold panga thawt hlawhchhuakin, a chipui Zhao Yunlei kutah mixed doubles title pathum leh women’s doubles title pahnih a lut ve bawk.
Vawiin second round match pakhatah Sindhu hian 21-7, 21-19-a Bulgaria player Stefani Stoeva hnehtu Canadian Wen Yu Zhang a tum leh ang.
Indian doubles pair zingah Treesa Jolly-Gayatri Gopichand leh Hariharan Amsakarunan-MR Arjun pawhin round sang zawk an lut ve tawh bawk.
Commonwealth Games bronze medalists Treesa Jolly leh Gayatri Gopichand tangdun chuan women’s doubles first round hnehna nuamsa changin Spanish pair Paula Lopez leh Lucia Rodriguez chu 21-9, 21-13-in an vaw tla.
Men’s doubles first round match pakhatah Hariharan Amsakarunan leh MR Arjun inkawp chu second round an luhna kawnga an tumpui Scott Guildea leh Paul Reynolds-te khel zo thei loa an inhnuhdawh avangin hahdam zawkin an tlang a, first round-a bye 15th seeds Min Hyuk Kang leh Dong Ju Ki of Korea an tum leh ang.
Star men’s doubles pair Satwiksairaj Rankireddy leh Chirag Shetty-te pawh seeded fifth ni chunga an inlanna turah first round an bye avangin second round lamah Scotland pair Alexander Dunn leh Adam Pringle tum chungin bul an tan dawn a ni.