Bultanna inkhelah Barca chak zo lo
Pathianni khan champion lai Barcelona chuan Spanish La Liga season thar bul an tan a, Getafe mualah goal goal awm loin an inhnehtawk.
He inkhelah hian yellow card leng chum chum karah red card pathum phawrh niin, hnawh-chhuah zingah mikhual manager Xavi Hernandez a tel!
Champion Barca hian Mad-rid khaw chhim lam venga ni sa rumrut hnuaiah inkhel tir lam thununin, an Brazil winger Raphinha chu Getafe tlarhnung tan a hnawksak hle a, goal thunna hun remchang pawh a siamchhuak nual a, mahse, goal ber a khung zo lo.
Minute 36-ah Rapinha hian a thun teuh hle a, Getafe goal-keeper David Soria chuan dangperin, a team mate-in ball letleh hmang chuan goal a zawng chhunzawm a, goal ban sirah a chhuak hlauh.
Chawlhlawk dawn minute 42-ah goal khung thei lo Leeds forward hlui Raphinha talbuaiin Getafe player Gaston Alvarez chu a kiu hmangin a nghawk a, hnawhchhuah a ni.
Second half tir lam minute 57-ah Getafe pawhin player pakhat chan ve lehin, Ronald Araujo laka hlauhawm taka che Jaime Mata chu a tum hnihna atan yellow card pek a ni a, khelmual atanga hnawhbo a ni ve leh.
Season liamta La Liga top scorer Robert Lewandowski pawhin Catalan team tan goal thun theihna hun remchang a bawhpelh a, hnai set sawt atanga a tauh chu goal line atangin Alvarez chuan minute 63-ah a hnawlchhuahsak.
Minute 71 an chuangkai a, Barca manager Xavi chuan referee thu-tlukna a sawisel duhthawh deuh a, red card hmangin technical area atanga hnawhchhuah a ni.
Hun pekbelhah referee Cesar Soto Grado thutlukna sawihlawh hmuh tur awm zui lehin, Araujo laka foul chu penalty pek awm tak a nih laiin VAR-in handball awm nia lang chu khelmual sira monitor en tura thu-rawn a pek hnawlin penalty a ham lo.
Minute 20 dawn hun pekbelh a ni chungin Spanish champion-in goal an khung zo lo a, point khat leu leu an lungawipui mai a ngai.
Barcelona hian Getafe khelmuala chak hi an harsat rei ta viau a, Coliseum Alfonso Perez-a La Liga game-ah hian kum 2019-a an chak bak kha hnehna an sualchhuak leh thei ta ngai lo a; khami hnu khan 0-0 draw vawithum nei tling tawhin, tum khat sikhat faiin an tlawm bawk.
Inkhelh banah Xavi lungawi lo tawngkam hriat tur awmin, “Foul a ngaizam tam lutuk tih ka hrilh a, min petchhuah phah. Minute 20 dawn hun pekbelhte kha a zahthlak a, a zia lo takzet a ni.
“Player 10-a kan khelh dan khan min tilawm tho a; chance pawh kan siamchhuak tam a, kan hmangtangkai zo lo mai a ni.
“Nikum pawh khan tun ang chiah hian bul kan tan a, a tawp-ah kan champion zui ta tho a,” tin an result-a a buai loh thu a sawi.
Pathianni inkhelah khan Man-chester City captain hlui Ilkay Gun-dogan chuan Barcelona tana a La Liga debut nghakchhuakin, tan hnu lawkah goal thun theihna hun remchang hmu mah se a team thar tan goal a thun zo lo a, goalkeeper zawn taka a chhuih lai khan offside-a ham a ni bawk.
Kum 32 mi German Gundogan hi tun nipui insuan hun laia Spanish giants zawm thar zinga mi a ni.
Bultanna inkhelah Barca chak zo lo
