Bundesliga season thara khel tha, tlawm nei lova kal tluang mek RB Leipzig chuan inrinni zan khan hnehna an chang a, an hmahruaina an tizau. RB Leipzig an chak laiin Borussia Dortmund an tlawm a, an talbuai thui zel thung.
German club hmasawn leh thang duang tak RB Leipzig hian Red Bull Arena-ah table hnuai lama awm mek SC Freiburg an mikhual. An mikhual lakah bul tan tha lovin, goal chhuah hmasa zawkah tang bawk mah se 3-1 in hnehna an chang let a, point thumin Bayern Munich an kalsan.
Red Bull Arena-a lenglut SC Freiburge tan hian Ritsu Doan chuan minute 15-na lekah hmahruaina goal a thun. He goal hi RB Leipzig in hun rei tak chhung an sut thei lo va, hnufual zawk ni chungin chawlhlawk an hmang. Chawlhlawk hnu lama RB Leipzig an khel tha a, goal an thun ta thuai thung. Second half tan atanga minute hnihna lekah Willi Orbán chuan goal thunin an si phurh a sut.
Goal khat ve ve an thun hnuin RB Leipzig an khel tah leh zual. Lutsharel Geertruida chuan minute 58-naah hma an hruai letna goal a thun a. An chakna nem nghet turin Loïs Openda chuan minute 78-naah an goal thumna a thun zui leh bawk. Openda goal thun hnuin goal danga luh belh thei tawh lova, RB Leipzig chuan 3-1 a hnehna changin point thum an hmuh belh. Leipzig hi tlawm nei lovin an kaltluang zui zel a, khelh 10 atanga point 20 hmuin hma an hruai chhunzawm.
RB Leipzig in hma lam an pan zel laiin club lian Borussia Dortmund erawh an talbuai chhunzawm zel a, FC Augsburg hneh lovin an tlawm leh ringawt.
Augsburg laka Dortmund in bul an tan tha viau a, inkhel tan atanga minute lina lekah Donyell Malen goal thun hmangin hma an hruai nghal. Hma takah goal chhuah mah se FC Augsburg tan hian Alexis Claude-Maurice chuan goal hnih a thun a. An mikhual team lian lakah 2-1 in hnehna an chang zui ta a ni. Dortmund hian season tharah vawi 8 an khel tawh a, vawi thum ngawt tlawm zawkah an tang tawh. An tlawm ngun tak em vangin Dortmund hian insiamthat thuai an mamawh.
Bundesliga hmahruaitu Leipzig
