Goal thun kawnga Germany pan fuh Harry Kane chuan Bayern Munich tana a hlutna phochhuah belh zelin, Inrinni zan Bundesliga inkhel pakhata Allianz Arena mikhual Mainz laka 8-1 hnehna an sualchhuah kawngah goal thum a thawh a, debut Bundesliga season-a hat-trick heti zat siam tling thei hmasaber ni chungin Germany ramah record a siam belh kal zel.
England captain Kane hian a Bundesliga season hmasaber kal meka match 25 a khelh tawh atangin goal 30 a tilut tling ta a, inelna dang nen belhkhawm phei chuan club leh ram tan tun season chhung hian goal 40 a thun tling tawh a ni.
Heti tak hian Bayern a zawm hnuin goal thun kawngah mir chho nghal mah se trophy lak kawnga a hlawhchhamna erawh Germany ramah pawh a la kalsan tak tak thei dawn lo emaw tih turin a club vawn lai Bavarians chu tunhnai season hnuhnung 12-a a vawikhatna atan an champion zo dawn lo niin a lang hman thuak thuak a, he thu buatsaih lai hian table-ah pahnihna la luah chhunzawm zelin, an chung chiaha hmahruaitu Bayer Leverkusen aiin game khatin an khel tam a, point sarihin an inthlau mek a ni.
Leverkusen hian nizan result tarlanhman lohah Wolfsburg an mikhual a, an chak chuan Bayern lakah hian point 10 bawkin an sang chhunzawm leh dawn a, Harry Kane tan a career-a trophy hlawhchhuah beiseina a tlahniam leh hlek dawn a ni!
Inrinni zan inkhelah table-a 17-na luaha relegation zone-a tang mek Mainz chuan Munich khawpuiah mualneitu team an dang zo ngang lo a; tan atanga minute 13-na lekah Kane chuan home team goal hmahruai khungin, chawlhlawk dawn leh second half laihawlah goal hnih dang khungbelh lehin a Bundesliga season khatnaah hat-trick vawili a siam tling ta chiah a, chutiang ti thei hmasaber a ni.
Bundesliga title hnuhnung 11 la zawn vek chunga German champion ni zawn rei ber record an siam mek chhunzawma title 12 lak zawn tlin tum Bayern hian Xabi Alonso team Leverkusen an hmakhalh thei ta tlat lo a, chuti chungin Bayern manager Thomas Tuchel chuan beiseina an la thlah loh thu a sawi.
Chelsea manager hlui Tuchel chuan an dihnumn khirh tak pawm chungin season tawp thlenga theihtawp an chhuah chhunzawm zel tur thu Mainz an sawp zawhah a sawi.
Bayern hian karliamta last 16 second leg-ah khan sithum faia an mikhual Napoli hnehin khelh hnih belhkhawmah 3-1 hnehna nen Champions League quarter-final an lut fel tawh a, tulachhung league-ah pawh goal thun an harsat lo leh ta rih.
Mainz lakah hian England striker Kane-a goal thum bakah Leon Goretzka chuan goal hnih thunin, Thomas Muller, Jamal Musiala leh Serge Gnabry-te’n goal khat diat diat an thawh ve bawk.
Mainz goal neih chhun hi minute 31-a Nadiem Amiri tihluh a ni.
Werder Bremen 1-2 Borussia Dortmund
Inrinni Bundesliga inkhel dangah January thlaa a club hlui Dortmund lama loan-a kirleh England forward Jadon Sancho chuan goal khat thawhin, a kirleh hnua game kua a khelh atangin a goal hmasaber a hlawhchhuak ta a ni.
Kum 23 mi Sancho hi Borussia Dortmund-a a hun hmasa lamah khan a chefuh a, German club tana a thawhhlawk em avangin July 2021 khan Manchester United chuan pound maktaduai 73-in England-ah an hruaikir a, mahse, Old Trafford-ah chuan a boruak hip a dang ta daih a, a chetha mar thei ta hlek lo a, manager Erik ten Hag nen an inkar a fuh loh chhoh tak bawk avangin nikum August ni 26 atang khan United tan a la khel leh ta lo vang vang a, September thla aatang phei chuan first team rualin training pawh a kalpui ve ta lo a, January thlaah a club hlui thuam inbel turin an chhuahtir ta nge nge a ni.
Dortmund lama intuaithar tura a kirleh hnuah pawh goal khung a harsat chho ta zel a, tarlan tawh angin, Inrinni match kha a goal khung lehna hmasaber a la ni leih leih chauh!
Bundesliga season khatnaa hat-trick vawili siam thei hmasaber Harry Kane
