Bunghmun kum 125 tlin leh
RD Block kum 50 tlin lawm
Lunglei district Bunghmun khua chuan an kum 125 tlin leh, Bunghmun RD Block kum 50 tlin an lawm a. Rural Development minister Prof. Lalnilawma’n a hmanpui.
December 11 & 12 khan “Inpumkhatna” tih thupui hmangin an khaw kum 125 tlin (quasquicentennial) lawmna leh ‘Bungkhawpui Haw Runpui’ an buatsaih a. RD minister bakah Thorang bialtu MLA Er R Rohmingliana, Thorang bialtu MLA hlui Zodintluanga leh Bunghmun khaw chhuak ex-MLA B Lalchungnunga te chu sawmbik an ni.
Tunhma atanga Bunghmun khaw tihmingthatute chawimawi an ni a. Cultural programme pawh neiin, ran lu kimin an kum 125 tlin lawmna tlang ruai kil a ni bawk.
Bunghmun khua hi Haulawng lal Thangvunga Sailo fapa Lalhmingliana’n South Lushai Hills bawrhsap (superintendent) Tarmita (Capt. J Shakespear) phalnaa a din niin, kum 1899 atang khan mei mit loin luah a ni. Tunah in 230 vel awmin, mi 1250 vel an cheng a. Rural Development Block thuthmun niin, kum 1974 khan RD Block bul tan a ni a. Sawrkar office pawimawh tak tak awmin, Lunglei District hmarthlang lama khaw pawimawh tak a ni.
Bunghmun khua hi Community Development Block hmun atan kum 1973 atangin sawrkarin a ruahman tan a. 1974 January 7 khan Lunglei BDO Zodinpuii’n Community Development Block a hawng. A din tirh atangin tun thlengin Bunghmun RD Block hian BDO 29 nei tawhin, BDO hmasa ber chu Vanengmawia a ni a, tunah hian Dr Lalramdintluanga a awm mek. Thawktu establishment staff 6, MGNREGS staff 19 leh MzSRLM staff 10 awmin, a vaiin thawktu 35 an awm
Bunghmun RD Block huamchhungah hian khaw 20 leh sub-village 2, a vaiin khaw 22 a awm mek a ni.
Bunghmun kum 125 tlin leh RD Block kum 50 tlin lawm
