Bungraw kara thuhruk heroin
manna atangin a dang man belh
Myanmar atanga tawlhluh, bungraw dang kara dah heroin manchhuah atangin a dang tam zawk man belh a ni.
Excise & Narcotics Department leh Central YMA hnuaia ruihhlo dotu CADS chuan an thu hriat bawhzuiin kumin May 27 zing dar 6.30 khan Zokhawthar – Aizawl Maxi Cab service pakhat atangin artui bawma dah heroin gram 150 (hawng 11) an man a. Hemi tuk vek hian mattress kara thuhruk, heroin kg. 1.387 (hawng 110) an man leh.
Hemi bawhzuina kal zelah Excise & Narcotics Department chuan May 28 khan he case-a inhnamhnawih nia puh C Lalrinmawii (39) Venglai East Kolasib inti an man a. June 2 khan he case-a inhnamhnawih thoa puh Ruthi Lalduhawmi (24) Vairengte Hall Veng leh John C Lalhmangaiha (28) Vairengte Kawngthar Veng nia inchhalte chu man leh an ni.
Excise & Narcotics Department hian chhui zelin June 6 khan Vairengte Kawngthar Vengah heroin kg 2.112 (hawng 165) an man belh a. He case-a heroin man zawng zawng chu kg 3 leh gram 649 (hawng 286) a ni. Inhnamhnawiha puhte hi ND&PS Act 1985 tlawhchhanin thubuai siamsak an ni.
Bungraw kara thuhruk heroin manna atangin a dang man belh
