Burkina Faso-ah sipai ten pawtsei

Burkina Faso military government chuan sipai rorelna chu kum nga atana an pawhsei thu an puang.
He ram roreltu ber Capt Ibrahim Traore chuan presidential election neih leh hunah a in candidate theih tur thu a sawi bawk.
Kum hnih dawn kaltaa thuneihna a chan khan Capt Traore chuan kumin 1 July hma ngeia civilian sorkar din a intiam thung a.
Tihian Burkina Faso hian a thenawm Mali ang bawkin sipai rorelna a pawtsei ve leh ta a ni.
Karkalta Inrinni khan capital city Ouagadougou ah national consultation meeting neih niin chutah chuan thutlukna siam a ni a. Amended charter siam Capt Traore an hming a ziah hnanah chuan kumin July 2 atanga chhiar tanin thla 60 chhung chu sipai thuhnuaiah an awm leh dawn a ni.
“Sorkar insiamthat hun chu tuna huntiam siam hma hian peihfel vek tur a ni ang” tiin charter chuan a tarlang bawk.
Burkina Faso hi January 2022 atang khan Lt Col Paul-Henri Damiba an President Roch Kabore paihthlaa thuneihna a lak atangin sipai kutah a la awm char char a.
Col Damiba an civilian sorkar paihthlak nana chhuanlama a hman chu sorkar in Islamist violence nasa zual zel a timit thei lo tih a ni.
Kum 2015 atang khan Al-Qaeda leh Islamic State group a inziaklut jihadist rebel te chuan indona kalpuiin chuvang chuan mi sang tamin nunna chan phah tawhin in leh lo chhuahsan tam tak an awm bawk.
September 2022 khan Col Damiba chu Capt Traore chuan paihthla velehin a chhan a sawiah pawh helna nasa tak thleng mek chu a hmetmit thei lo a ti.
Capt Traore chuan ram security chu ‘thla hnih thum chhungin’ a siamthat hman tur thu leh thla 21 chhungin civilian sorkar din a tiam bawk.
Mahse tunah a thutiam chu hlen lovin Capt Traore chuan jihadist forces te atangin ram chan tawhte lakkir leh hma chuan inthlan chu pawimawh ber a ni lo tiin a sawi thung.
Charter thar siamah traditional party tena assembly a seat ruatlawk an neih te pawh nuaibo a ni ang tia sawiin ‘ram hmangaihna’ chu deputy te thlannaa tehfung awmchhun a ni ang a ti bawk.