Burma Advocacy Group (BAG) hruaitute chuan Ningani khan chief minister Lalduhoma an kawm a. Burma atanga raltlante tha tak leh duat taka Mizoram mipuiin an lo tuamhlawm avangin lawmthu an hrilh.
Chief minister hian Delhi-a Union Home minister Amit Shah nen an inkawmnaah raltlan chhawmdawlna kawngah a tul anga puih a inhuam thu a lo hrilh tih BAG hi hrilh chhawngin, “Kan unau, himna zawnga rawn raltlante hi kan theih ang angin kan pui zel dawn a. Tlawmngai pawl, kohhran leh mimalten nasa takin an tanpui a ni,” a ti. Raltlante chungchanga hmalakna thar a lo hrilh bawk.
BAG hi American Baptist Churches of USA leh US-a awm Chin Baptist Church, Karen Baptist Church, Baptist Union of Norway leh an thawhpui pawl hrang hrang an ni a. An hruaitu American Baptist Churches general secretary emeritus Rev Dr Roy Medley chuan Baptist Church ho leh Burma mipui hian kum 200 dawn inzawmna an lo nei tawh a. Tuna an harsatna leh manganna hi an vei em em a, an theih ang tawka tanpui an duh a, Mizoram mipuiin an lo tuamhlawmnaah pawh an lawm hle tih a sawi. Anmahni tanpui zel tura thawhpuina an ngen tih chief minister hi a hrilh a ni.
Burma Advocacy Group hruaitute hi Baptist Church of Mizoram leh Lairam Isua Krista Baptist Kohhran ten an lo mikhual a, Mizoram an cham chhungin mi pawimawh thenkhat hmuin an kal kual ang.
Ningani vek khan Burma Advocacy Group hian Mizoram Synod hruaitute an kawm a. BAG hruaitute hian Burma raltlante chhawmdawlna atana Mizoram Synod-in tanpuina a lo pek tawh avangin lawmthu an sawi. Mizoram Synod hian raltlante hnenah tanpuina Rs. 54,51,000 a pe tawh a ni.
Burma Advocacy Group-in raltlan chungchang CM sawipui
