Spain leh Barcelona midfielder ropui ni thin Sergio Busquets chuan football a chawlhsan dawn hnai a, Major League Soccer (MLS) season tawp rualin ballboot a khai ang a, player anga a football zin kawng a zawh tawp tawh dawn.
Midfielder tha ber ber zinga chhiar reng tawh tur Sergio Busquets hian kum 17 mi a nih laiin FC Barcelona academy a zawm. Barcelona senior team tan kum 2008 atanga kum 2023 thleng a khel. Barcelona tan kum 15 zet a khelh chhung hian inelna hrang hrangah vawi 722 zet a khel a, Barcelona tana khel tam zual pathum zingah a tel a. Defensive midfielder ni chungin goal 18 a thun. Catalan club lian Barcelona tan a khelh chhung hian La Liga-ah vawi kua an champion a, Champions League-ah vawi thum an champion tel bawk.
Barcelona tan ropui taka a khelh hnuin kum 2023 khan Mojar League occer club Inter Miami a zawm a. Barcelona-a a khelhpui thin Lionel Messi, Jordi Alba leh Luis Suarez te ten an khel ho leh thei a, USA-a a ni hmasa ber atangin a mikhual lo viau. Inter Miami tan hian vawi 69 a khel tling tawh a, goal khat a thun tawh. MLS season kal mekah play-pff khel turin an tling chiang tawh. Play-off atanga an tlak rualin player anga a football zin kawng a zawh tawp nghal dawn a, football a chawlhsan zui ang.
Ball thiam leh fing Busquets hian kum 2009 atangin Spain tan a khel tan a. Ram tan vawi 143 zet khel tling tawhin World Cup 2010 a an champion tum leh Euro 2012-a an champion tum khan Spain player pawimawh zinga mi a ni. Kum 38 mi lai ni tawh Busquets hian kum 18 zet football a khelh chhungin trophy 32 zet a hlawhchhuak tawh a. Club leh ram anga trophy lak theih zawng zawng la kim thei player tlemte zingah a tel.
Busquets a chawl dawn hnai
