C Ronaldo-a’n YouTube record a siam
Football superstar Cristiano Ronaldo chuan khawvel huapa a larnain tlakhniam lam a la pan lo tih a lantir leh ta a, tun tum chu inkhelh lamah ni lovin digital khawvelah a ni ve thung. He Portuguese icon, kum 39 mi hian pitch-ah hlawhtlinna tam tak a tawng tawh a, tunah chuan a la dai loh ram, YouTube-ah channel a siam thar ve ta a, record siam lehnghalin, YouTube-a subscriber maktaduai 10 nei rang thei ber a ni leh ta.
Ronaldo hian a YouTube channel UR Cristiano tih chu August ni 21 khan a siam thar a, khawvel hmun hrang hranga a fan ten an subscribe nghal ruih ruih a, channel a siam atanga minute 90 chhungin subscriber maktaduai khat a nei tling man a, hei pawh hi YouTube-a subscriber maktaduai nei tling rang thei ber record a ni. Tichuan le, darkar ruk a tlin leh meuh chuan subscriber maktaduai ruk chuang a nei tawh a, darkar 24 a tlin chuan subscriber maktaduai 10 a nei tling tawh.
A hmaa YouTube-a subscriber maktaduai 10 nei tling rang thei ber record siamtu chu Hamster Kombat niin, ni sarih chhungin subscriber maktaduai 10 an nei hman a, he record hi UR Cristiano hian a rawn khum chiang hle a ni. UR Cristiano hian nimin chhun dar 12 thleng khan subscriber maktaduai 14.3 a nei tling der tawh a ni.
Ronaldo pawhin hetiang khawpa subscriber a nei chak hi a lawmthu social media lamah puangin, “Kan chungkaw tana thilpek. SIUUUbscribers zawng zawng chunga ka lawm e,” tiin YouTube atanga ‘Gold Play Button’ a dawn a fate hnena a entir lai thlalak a dah tel bawk. (SIUUUbscribers a tihna chhan hi subscriber spelling a hriat loh vang emaw lo tingawt lo ula, a goal khung lawmna ‘siuuu’ kha a rawn hmang ve leh a nih hi aw. Siuuu hi Spanish-a ‘Yes’ tihna a nih hmel e).
Ronaldo hian X-ah pawh follower maktaduai 112.5 neiin, Facebook-ah maktaduai 170 leh Instagram-ah maktaduai 636 a nei bawk a, heng a social media-ah te hian a YouTube channel neih tur hi puangin, “Kan nghak chhuak ta. Ka @YouTube channel a awm ta e! He zinkawng tharah hian SIUUUbscribe in min zawm theuh rawh u,” a ti a, social media platform danga hetiang khawpa follower ngah tawh sa tan chuan subscriber maktaduai 10 neih rana record siam pawh a awl deuh a nih mah na!
Ronaldo hi Saudi Arabian club Al Nassr a khel mek a ni a, footballer tana chawimawina sang Ballon d’Or pawh tum nga dawng tawhin, football khawvel mai pawh ni lo, infiamna khawvelah hrim hrimah ani aia lar zawk hi an awm rih bik chuang lo ang.
UR Cristiano channel-ah hian video a dah nghal nual a, chung zingah chuan teaser trailer, quiz game hlimawm a kawppui Georgina Rodriguez nena an tih vel te, Madame Tussauds-ah a khawihnun lim an siam a en lai clip te pawh a tel.
C Ronaldo-a’n YouTube record a siam
