Citizenship Amendment Act (CAA) chungchang inhnialna kal mek zelah Home Minister Amit Shah chu zawhna: Eng vangin nge Parsis leh Christian te CAA hnuaia an awm a, Muslim te an tel ve loh? tia zawh a ni a. CAA hian Pakistan, Afghanistan leh Bangladesh a sakhuana thila tihduhdah tuarte December 31, 2014 hma lama India-a lutte khua leh tui nihna a pe thei a ni.
News agency ANI ten zawhna an pekah Shah chuan eng vangin nge India rama piang ni lo sakhua Parsis leh Christian te khua leh tui nihna pek theiha Muslim te huam tir ve loh a ni tiin an zawt a.
“Khang area te kha tuna India ram a ni ta lo a, a chhan chu Muslim population vang a ni a. An tana pek a ni a, ka ngaihdan chuan Akhand Bharat huamchhunga sakhuana thila tihduhdan tuartute khua leh tui nihna pek hi kan mawhphurhna a ni” tiin a chhang. Akhand Bharat tih hi united greater India tih niin tunlaia Afghanistan, Bangladesh, Bhutan, India, Maldives, Nepal, Myanmar Pakistan, Sri Lanka leh Tibet te pawh a huam a ni.
Home Minister chuan Partition lai khan Pakistan ah Hindu 23 per cent an awm ti a. “Tunah chuan 3.7 per cent chauh an ni tawh, khawiah nge an kal? Mi tam ber te India ramah an lo kal reng reng lo. Tihluihnaa sakhua a inleh luihtir an ni a, muaphova siam an ni a, second-class citizen anga enkawl an ni. Khawiah nge an kal ang? Kan Parliament leh political party te hian heng thilah hian thutlukna kan siam dawn lo em ni?” tiin a sawi.
Kum 1951-ah khan Bangladesh a HIndu population chu 22 per cent a ni a ti bawk a. “Kum 2011 a nih meuh chuan 10 per cent ah a tla hniam tawh. Khawiah nge an kal?” tiin a sawi bawk a.
“Afghanistan-ah kum 1992 khan Sikhs leh Hindu 2 lakhs vel an awm a. Tunah 500 vel chauh an awm tawh. An sakhua duh vuanin an cheng ve thei lo em ni? Bharat hi pakhat a nih chuan anni pawh kan mi leh sate an ni a, kan unau leh kan nu te an ni” tiin a sawi bawk.
Community tihduhdah tawk Shia, Baloch leh Ahmadiyya Muslim te chungchang zawhna pawh, “Heng bloc te hi khawvel chuan muslim bloc ah a ngai. Muslim te pawhin kan ramah khua leh tui nihna an dil thei tho. Constitution in provision a nei thlap a, dilna siam se India sorkar chuan thutlukna national security te ngaithuah chungin a siam mai ang” a ti bawk a. CAA chu heng ram pathuma tihduhdan tuar te document tel lova India ram lutte tana ‘special Act’ a ni a ti bawk.
Document engmah nei lo awm se tia zawhna pawh Shah chuan, “Document nei miah lo te lakah pawh ruahmanna kan kalpui tho ang. Mahse, kan hriat chinah chuan 85 per cent vel te chuan document na nei a ni” a ti bawk.
CAA chungchang Shah-a’n sawifiah
