Chakma Autonomous District Council (CADC) rorel inkhawm kaihruaitu chairman-in Zirtawpni khan banna a thehlut a, banna a thehluh hnu hian ZPM sorkar a piang dawn tiin The Aizawl Post a hrilh.CADC chairman Kali Kumar Tongchangya chuan Zirtawpni khan banna a thehlut a, Chawngte-a district council secretariat-a secretary kutah larsap hnena hlan chhawn turin banna hi a thehlut a ni. Secretary hian chawlhkar khat chhungin larsap hnenah a hlan chhawng ang.
EM (executive member) thenkhat chu tun hnaiah CEM (chief executive member)-in a ban niin a sawi a, anni an ban laia lo ban ve loh chu a mawi lo tia sawiin, ZPM sorkar a pian theih nan a bang tih a sawi bawk.
CADC-ah hian MNF an sorkar a, mahse tun hnaiah MDC thenkhatin party an sawn; MNF lamah hian MDC 11 an awm mek a, a lehlamah MDC pakua an awm.
May thlaa an inthlan khan MNF-in MDC 10, BJP leh Congress-in MDC panga ve ve an nei a, BJP MDC pangate leh Congress MDC palite’n MNF an zawm zui a ni. Mizoram inthlanpui neih hnuah BJP ticket-a tling, MNF zawm ta mi pangte chu BJP-ah an let leh.
Tun hnaiah MNF MDC pahnihin ZPM an zawm a, Congress ticket-a thlan tlin pakhatin ZPM a zawm bawk. BJP MDC palite’n ZPM an zawm bawk a, ZPM hian MDC pariat an nei mek.
Chairman atanga bang ta Kali Kumar Tongchangya chuan MDC an neih belh dawn niin a sawi a, “ZPM sorkar a piang ngei ngei ang,” a ti. Mahse a hun tur erawh sawi lawk theih a ni lo tih a sawi.
BJP MDC pakhat chu an lamah a tang niin a sawi a, sorkar lo lamah MDC pakua an awm tih a sawi.
CADC chairman-in banna thehlut ‘CADC-ah ZPM sorkar a piang dawn’
