Chakma Autonomous District Council sum cheng nuai 40 chuang hmansual avanga court-in thiam loh a chantir, chief executive member leh executive member hlui mi pariat chu kum 4 theuh lungin tang tur leh cheng nuai hnih theuh chawi tura hrem an nih bakah an sum chawitur an pek theih loh chuan kum hnih theuh lung in tan belh tura hrem an ni.
Prevention of Corruption Act Special Court-in hremna a pek chhan a tarlan danin, an sum khawih chingpen zat hi a tam hle a, a mi chengte leh mi chhumchhiate hamthatna atan court rorelna kaltlangin District Council inrelbawlna chu siamthat a tul hle tih a sawi. Anmahni thlangtlingtute dikna chanvo humhalhna atan mipuiin an aiawh atana an thlanchhuahten an thuneihna an hmansual fo chu tawmim tir a tul tih a sawi bawk.
Court-in thiam loh a chantirte chu – Shanti Jiban Chakma, Hiranand Tongchangya, Sanjeev Chakma, Kusum Lota Chakma, Onish Moy Chakma, Buban Kumar Chakma, Mohan Chakma, leh Anil Kanti Chakma te an ni a. Thubuai pahnihah thiam loh chantir niin, hei hi kum 4 tan leh cheng nuai khat ve ve chawina tur a ni.
Court hian ngaihnatthiamna pe in, thubuai pahniha thiam loh an channaa kum 8 an tan tur hi hmun khatah lakawpin kum 4 an tang anga, an sum chawi tur erawh kalkawp loin cheng nuai hnih an chawi thung dawn a ni.
CADC sum hmangsualtute hrem
