CADS batch tharin ruihhlo kaih
hnawihah 300 cuang man tawh
Central YMA hnuaia ruihhlo dotu Central Anti Drugs Squad (CADS) chu kumin January 20 khan batch tharin an kalpui tan a, hemi hnu hian heroin leh ruihhlo danga inhnamhnawih Aizawl leh a chhehvelah chauh mi 300 chuang an man tawh.
January 20 atangin March 6 thleng chhiarin ni 44 vel a kal hman tihin Aizawl leh a chhehvelah ruihhlo ti leh zawrh vangin mi 350 vel man an ni tawh a, heroin bakah ruihna atana hman thin damdawi dang leh ganja engemawzat man a ni tawh bawk.
CADS hian kar khat chhung ang vel zelin report an nei a. January 23-30 chhung khan heroin hawng 34 leh a thentetna atana hman Tictac bur 192-a dah heroin an man. Ganja kg 4.483 an man bawk. January 31-February 6 chhungin heroin hawng 37 leh Tictac 78 bakah ganja gram 465; February 7-13 chhungin heroin hawng 13 leh Tictac 47, ganja gram 352; February 14-20 chhung heroin hawng 33 leh Tictac 38, ganja kg.5 & gram 871; February 21-27 inkarah heroin hawng 10 & Tictac 111 bakah ganja kg.10 & gram 196; February 28- March 6 inkarah heroin hawng 15 & Tictac 165 leh ganja gram 963 an man a ni. Hei bakah hian ruihna atana hman damdawi mum leh a tui thahnem tak man tel a ni.
Tunhnai kar hnih chhunga ruihhlo avanga CADS-in an man hi kar khatah mi 70 chuang ve ve an ni a; a bikin heroin leh heti lama inhnamhnawih mihring man an pung. Chutihlaiin Central YMA hian tunhnai kar hnih chhung vel hian hma lak dan siamtharin Aizawl City Branch ho chu zone-ah thenin mahni zone theuhah ngawrh zawkin YMA-ten ruihhlo do beihpui an thlak a, hei hian man a tipung nia ngaih a ni.
CADS batch tharin ruihhlo kaih hnawihah 300 cuang man tawh
