CAF Africa Cup of Nations:
Last 16 lut zingah Pharaohs
Thawhtanni khan Africa khawmualpui ramte football-a inelna sang ber 2025 Africa Cup of Nations (Afcon) khelh mekah 3-1-a Benin hnehin Egypt chuan quarter-final an lut a, nizan last 16 inkhel result tarlan hman loh Ivory Coast leh Burkina Faso inkhela chak zawk zawk chu Inrinni hian Agadir khawpuiah an hmachhawn leh ang.
Stade d’Agadir inkhelah Egypt leh Benin kha hun pangngaiah 1-1-in an inhnehtawk a, extra time-a Yasser Ibrahim leh Mohamed Salah-te goal hmangin Pharaohs
an tlang hram a; kum 2019-a last eight lo chuangkai ve tawh Benin-in kha mi kuma an hlawhtlinna chen kha an thleng zo ta lo.
Marrakesh khaw round of 16 inkhelah first half chhungin goal a lut zo lo a; minute 69-ah Egypt midfielder Marwan Attia chuan goal hmahruai khungin, minute sarih chauh awm tawhah Beninese midfielder Junior Olaitan-a cross chu an dankawi sak a; Egypt goalkeeper Mohamed El Shenawy chuan line atangin thaisawn thei hram mah se ball tla hlang chu Jodel Dossou chuan Benin siphurh sutna’n a hmang zui ta tho a ni.
Tarlan tak angin, team pahnih hian 1-1 a nih hnuah goal an khungbelh theih loh ve ve avangin extra time an khel a, tah chuan Egypt lamin goal hnih an khung ta bik a; a ram tana Afcon title la sualchhuak zo tlat lo Salah chuan minute 124-ah an goal thumna thawhin, Afcon a hmachhawn tawhah belhkhawmin goal 10 a tilut tling ta chiah a ni.
Liverpool lama season bul tan fuh lo leh chhuak mai tura sawi reng Salah tan Afcon trophy hi a career hmui taka title a la sualchhuah loh lian langsar lawk lurh niin, tunah kum 33 mi a ni ve tawh a, kum 2011-a international debut a nghahchhuah hnuah kumin hian a ram a champion-pui zo lo leh a nih chuan African champion ni loin a chawlh a ngai ve tawh mai thei!
Ram tana a khelh tan hma kum chiah khan Pharaohs chuan record siamin he khawmualpui huap title hi tum sarih an la tling a; Egypt player zinga Premier League lama hming chher ber tih ngam Salah lo lan hnuah an champion thei ta tlat lo a, final match tum hnih ngawt khel tawh chungin champion team zingah a la tel pha lo chhunzawm zel rih!
Club lamah Salah hian Reds boss Arne Slot-a duhsakna a dawng pha ta lo a, ram tan tal a hlawhtlin zawh loh leh chuan a hmalam hun hi a eng vak lo mai thei!
Morocco rama khelh mek Afcon-ah hian goal thum thun tling tawhin, he tournament bika goal a la khung hnem ber tum a ni.
CAF Africa Cup of Nations: Last 16 lut zingah Pharaohs
