California-a vur tawlha bo mi pariat ruang hmu
Thawhlehnia California-a Lake Tahoe huam chhunga vur tawlhin a chhilh avanga zan riaka vur tleng thin chin hriat lohva awm zinga pariatte ruang chu chhanchhuah hna thawktuten an ruang an hmu.
Mi dang pakhat chin an la hre lo va, a thi tho ni ngeia an rin thu Nevada County Sheriff Shannan Moon-i chuan a sawi.
Thuneitute chuan thi zinga pakhat hi a zawn leh chhanchhuah hna thawktute zinga tel pakhat kawppui a ni tih an sawi a, ‘rilru hreawm tak chungin’ an zawng tih an sawi.
Thawhlehni chawhma dar 11:30 (India-a Nilaini zing dar 01:00) vel khan Castle Peak-ah football field tiat vela zauva vur tawlhin vur tleng mi 15 chu a chhilh a, an zinga paruk chu chhanchhuah an ni.
Placer County Sheriff Wayne Woo-a chuan Nilaini khan chin hriat lohva awmte hi vurin a khuh vek a, lak chhuah mai an harsat thu a sawi.
Vur a tawlh hnuah hian heng lai hmunah hian vur feet 3 vel a tla leh tawh niin Tahoe National Forest supervisor Chris Feutrier-a chuan a sawi a. “A la hlauhawm hle,” a ti.
Ruangte hi lak chhuah pawh a la theih lo va, lak theih veleh Placer County morgue-ah lak an ni ang a. An chhungte pawh hrilh an ni tawh a, tute nge an nih erawh puan a la ni lo.
An zinga pasarih hi hmeichhia niin mipa pahnih nen an nih thu an sawi.
Placer County, California-a vur tleng zirna, Sugar Bowl Academy chuan an hnena zir pawh an tel niin an sawi.
Sheriff Woo-a chuan chhanchhuah hna thawhnaah hian hmanraw tha bik nen ‘khaw awm dan nuam lo tak hnuaiah’ team hnih leh crew member 50 an thawk chhuak tih an sawi.
Thawhlehni tlai dar 05:30 vel khan dam chhuakte awmna atanga mel hnih vela hla, chhiatna thlenna hmun an thleng a. Dama chhanchhuah zinga pahnih hi an inhliam avangin an kal thei lo va, damdawi inah lak an ni.
Dam chhuak zinga pakhat hi a kaihruaitu niin mi dang pangate chu a kaihhruaite an ni a. An vaiin recreational skier 11 leh ski guide pali an ni.
Thawhlehni tuka vur tawlh hi zan thum riak chhuaka vur an tleng tawpna ni tawh tur a ni.
Sierra Avalanche Center chuan vur tawlh hi a hlauhawm dan an sawinaa D2.5 a nih thu leh a zau zawng mek chanve thleng, feet 6.5-a chhah thleng ni thei a ni.
A bula Boreal Mountain Ski Resort chuan Thawhlehni atang khan vur hi inches 30 a tla tawh niin an sawi a. Resort pawh thli thaw nasa leh khaw hmuh that theih loh vangin Thawhlehni khan an khar tih an sawi.
Vur tla nasa avang hian Interstate 80 leh Highway 50 nen kawngpui tam tak khar a ni.
California-a vur tawlha bo mi pariat ruang hmu
