Los Angeles Lunar New Year lawmna neih chhunzawmna club a ballroom dance hall-ah mi pakhatin mi 10 kaphlumin midang 10-in hliam an tuar.
Californian police te chuan heng mite kaphlumtu ni ngeia ngaih Huu Can tran, kum 72-a upa chu Van varah thiin an hmu a. Amah leh amah a inkaphlum niin LA County Sheriff Robert Luna chuan a sawi.
Asian mite tamna Monterrey Park ah Lunar New Year lawmna neih a ni a. Police te chuan mi kaphlumtuin eng vanga hetianga chetla vak nge a nih an la hre thei lo.
Hliam tuar 10 zinga pasarih te chu damdawi Inah la awm mekin a thente chu an dinhmun ngaihtuah awm an ni bawk.
He mass shooting hi California history a turu ber pawl niin central Los Angeles atanga 11 km vela hlaa Star Ballroom Dance Studio a thleng a ni a.
Star Ballroom Dance Studio a mipui a pawng kah chiam hnu hian chhuakin studio dang a pan leh a, mahse, hetah hian mi pahnihin a semi-automatic assault pistol leh extended magazine te chu lo chhuhsakin amah chu a tlanchhuak zui thung.
“Heng mi pahnih a ralthuam lo chhuhsak tute hi heroes an ni. Nunna an chhanhim a, ni lo phei se chuan nunna chan tam tak la awm thei an ni,” tiin a sawi.
Shooting thlen hnu darkar 12 ral velah SWAT team te chuan Torrance carpark a van var inhung chu rinhlelh niin an hual a, Van awmna hi Moenterey Park a inkahna atanga 30 miles vel laia hla a ni tawh.
Sheriff Luna chuan Van an pan laiin silai Van chhungah a puah thu sawiin steering wheel bawhin a lo thi fel tawh a, a kut atangin a inkahna silai pawh lak nghal a nih thu a sawi bawk.
Sheriff chuan amah chauha chetla ni ngeia a lan thu sawiin rinhlelh midang an awm lo a ti bawk a. Van pawh chu a ruk a nih thu a sawi bawk.
Monterey Park a cheng 65% lai chu Asian-American an ni a, America a ‘Chinese suburb’ hmasa ber tia sawi thin a ni a. US khawpui lian zinga Asian ho tam tak chen tamna hmasa ber a ni bawk.
He thil thleng avang hian Monterey Park in Lunar New Year lawmna neih an tum pawhthulh zui niin red lantern leh festive banner hrang hrang kawtthler cheimawi nana hman te chu lakthlak zui nghal a ni.