Cambodia king a fapain thlak dawn

Cambodia-a hun rei tak rorel tawh chuan a fapa upa ber chu an ram hotu lu ber ni tura tiin thuneihna inhlanchhawnin a awm dawn ta a.
Thawhtanni khan Cambodia king chuan thupek tichhuakin kum 38 lai rorelna lekkawh tawh Hun Sen chu a fapa Hun Manet-an a thlak ang.
Hun Sen chuan 23 July inthlan zawh hnu chiah khan a chawlhsan tawh tur thu a puang lawk tawh a, kha inthlan kha democratic te chuan an sawisel nasa thung a.
A party te chuan parliament a seat panga hui vekin main opposition te chu vote thlak thei lo tura siamin an awm thung.
Hun Sen-an ngenna a siam hnuah King Norodom Sihamoni chuan royal decree a tichhuak zui ta nghal a ni.
Hun Manet hi kum 45-a upa niin Royal Cambodian Army commnader niin leadership role a chelh theih nana hun rei tak khalh fala awm tawh a ni.
Parliament-in August 22-ah a pawmpui la ngai thung niin mahse National Assembly-ah hian seat 125 awmah Hun Sen-a Cambodian People’s Party te chuan seat 120 an neih avangin awlsam taka pawm mai tura ngaih a ni thung.
Hun Manet cabinet tharah hian thalai zawk hmel hmuh tur a tam dawn tia sawi a ni a. Hun Sen ruala Khmer Rouge revolution leh civil war kum 1970 leh 1980 chhova paltlang tawh hote chuan an fate an kai sap sap hlawm tawh a ni.
Hun Sen hi khawvela leader nihna chelh rei ber pawl niin mipui maktaduai 16 chenna South East Asian ramah hian kum sawm li dawn rorelna a lekkawh a ni. Mahse, hun Sen hian ruling Cambodian People’s Party leadership dinhmun la chelh zui reng dawn thungin hei vang hian la thu ber tura ngaih a ni bawk.
Kum 1985 atanga rorelna a lekkawh hnuah authoritarian hawi zawnga kal char charin amah sawiseltute hi ngawih tirin emaw jail ah khungin emaw hma a la thin a ni.
Hun Manet hi US military academy West Point leh University of Bristol chhuak niin a pa ai chuan khirh lo zawk tura ngaih a ni thung. Chutih rual erawh chuan a inhawng zawk ang em tia lantirna engmah a awm lo tih a ni thung a. Hei bakah hian Hun Sen chuan kum 10 chhung tal chu ram inenkawlna kawngah sulsutu a la nih zui thu a sawi chiang bawk a.
“A tawpna a ni lo va. Kum 2033 thleng tal chuan theihtawp chhuahin ram rawngbawlna ka la kalpui ang” tiin Hun Sen chuan telegram post a siamah a ziak lang a ni.
Cambodia-ah hian opposition pawimawh turte chu che thei lova siam vek an nih avangin Hun Manet tan hlauh tur an tlem hle tura ngaih a ni a. Mahse, a pain lamtang invialchiat tha leh khauh tak leh mihausa chhungkuate a thlunzawm vek ang dinhmun siam tur chuan hna hautak tak a hmachhawn tura ngaih a ni thung.