Cambodia PM thar atan Hun Sen
Cambodia ram Prime Minister thlanna vote chhiar chu Pathianni kal ta khan neih niin Cambodian People’s Party chuan hnehna changin Hun Sen chu hneh takin PM atan thlan tlin a ni.
He inthlanah hian inthlanna dik leh felfai a awmlo nia an ngaih avangin European Union, US leh khawthlang ram te chuan inthlan enthlithlaitute an tir duh lo a ni. Hetih lai hian Russia, China leh Guinea-Bissau te chuan vote chhiar tantirh atangin Hun Sen tlinna tur vote chhiar hi an thlir reng thung a ni.
Cambodian PM thlannaah hian Hun Sen-a party te hian seats 125 ah seat 120 lain hnehna an chang chiang hle a, Royalist Party te chuan seat 5 an la ve a ni. Hun Sen-a party hi Cambodia ramah chuan party lian a ni a, tun inthlanah pawh hian an elpui party lian ber atang pawhin harsatna lian tham an tawk lo a ni. He inthlan sawisel hlawh tak Pathianni-a neih ah hian vote zaa 84 tlain mipui maktaduaih 8.1 in vote an thlak a, party lian ber chu Cambodian People’s Party niin party tenau langsar lo tak tak 17-in inthlanna hi an chuh ve bawk a ni.
Prime Minister Hun Sen hian kum 38 chhung Cambodia ramah ro a rel tawh a, an ram politics inelna hrang hrangte sukiang zelin tunah hian a fapa upa ber Hun Manet chu amah thlaktu turin ruahmanna a kalpui mek a ni. Hun Sen chuan a fapa tuna Royal Cambodian Army hotu Hun Manet chu thla leh maiah a aiawhtu tur a nih thut theih thu a sawi bawk a ni. United Nations-in kum 1990 atanga Cambodia ram tualchhung indona leh Khmer Rouge lal ram ata democracy rama a tundin leh atang khan Hun Sen-a party te hian kum 5 dan inthlan hi vawi ruk hmachhawn tawhin hnehna an la chang vek a, tun hi a zawna vawi 7 an chakna a ni tawh a ni.
Cambodia rama Hun Sen-a a lal reng theih chhanah hian sipai leh police a thunun daih te, mipui lawm zawng tur a buatsaih thiam leh amah dodaltu tur te thawhpui ah te a siam a, lung inah te a khung bo daih bawk a, a nih loh pawhin an ram ata a hnawtchhuak daih bawk thin, tiin a sawi theih ang.
Cambodia PM thar atan Hun Sen
