Canada leh India inbakkaihna kal mekah Western power-ten tan la nasa hle

Khawthlang ram minsiter leh official-te chuan Canada leh India inbakkaihna chuan hlet chhia a neih loh nan leh chhe zawka thil a kal loh nan hma an la nasa hle.
United States leh western powers tena an duh loh ber ni meka ngaih chu India nena inlaichinna chhia a ni a. Chu mi ‘grand geological chess board’ ah chuan India chu key player a ni tlat tih a ni.
India chu ram thiltithei thang chak tak a nih mai piah lamah khawvela mihring chen tamna ber leh economy lian ber pangana a ni a. Khawthlang ramte chuan China beihlet nana pawimawh bera an ngaih a ni bawk.
India pawimawhna chu G20 meeting India ramin a thlenah fiah taka langin Ukraine indonaa khawthlang ram tena Ukraine an thlawp bur chungin India duh danin Russia demna tawngkam hman a ni miah lo bawk.
G20-ah khan India nena inlaichinna tihchhiat duh lovin thuchhuah siamah pawh insumkarna an nei a, chu chuan Kyiv erawh a tithinur hle thung.
Tuna khawthlang ram tena an hlauh ber ni mek bawk chu Canada-India buaina kal mekah ram tinte chuan thlawp leh tan zawk bik neia lan an duh miah lo bawk.
Tunkar tirlamah Prime Minister Justin Trudeau chuan India chu June thlaa western Canada-a Sikh activist thah a nihnaah India chu inhnamhnawihah a puh a, chuvang chuan ram pahnih inkarah buaina nasa tak awmin ambassador an inhnawhchhuahsak hial a ni.
Tun hnaiah India chuan developing ram te – Global South tia sawi leader-ah inngaiin heng ram tam takte hian Russia-in Ukraine a run chu demna thu an sawi duh miah lo bawk.
US leh European ramte chuan heng ramte hi hneh tumin diplomatic hmanga nasa taka hma la-in Ukraine indona chu an economy nghawng a nih thu an fah nasa hle thung.
Diplomat-te chuan tuna India leh Canada buaina pawh Commonwealth ram ni ve ve si North v South battle ang leh trans-atlantic power leh developing nation inbakkaihna anga a chhuah an hlau hle a ni.
Canada foreign ministry chuan Trudeau-an India nena buaina chungchang chu US President Joe Biden leh British Prime Minister Rishi Sunak pawh hrilhin a titipui tawh an ti a. Canada allies-te chu tun dinhmunah an fimkhur hle.
White House chuan thuchhuah a siamah US chuan tualthaha inpuhna chu a ngai thutak takzet tia sawiin ‘Canada-in investigation a neih chu tha taka kalpuia thiltisualtute hrem ngei an ni tur a ni’ tiin a sawi.
UK leh Australia-te ang ram Sikh community thahnem tak awmna angah chuan tun buaina ang hian diplomatic lama inbeihna nasa tak a thlen thei hrim hrim bawk.
UK Foreign Secretary James Cleverly chuan Britain chuan ‘Canada-in a ngaihmawhte ngun takin a ngaithla ang’ tiin a sawi a. Canadian Foreign Minister Melanie Joly chuan a hrilh hriat tawh thu sawiin, UK chuan Canada thusawi te chu a ngai thutak takzet a ti bawk.
Britain-in India nena trade talk an neih mek chu a thulh dawn em tia zawhnaah engmah chhanna siam duh lovin UK chuan Canadian investigation tena thutlukna an siam a nghak phawt dawn tiin a sawi.
“Canada leh India-te hi UK thiantha niin Commonwealth partner te ve ve an ni” tiin Cleverly chuan a sawi bawk.
Australia foreign ministry pawhin thuchhuah a siamah Canberra chuan Canada-in puhna a siamte chu a ngai thutak takzet tia sawiin, India thuneitute hnenah pawh hriattir a ni tiin a sawi bawk.
Tun dinhmunah chuan khawthlang ramte chuan Canadian investigation chu nghah phawt nise an ti a. Tualthahnaa India a inhnamhnawih ngei tih finfiah a nih chuan thil a inthlak danglam nasa thei viau dawna ngaih a ni bawk.
Chutiang a thleng a nih chuan Western power-te chuan Ottowa nge New Delhi an thlan a ngai dawn a ni. Tun hma pawhin Western nation-te chuan Russia emaw Iran leh Saudi Arabia-te pawhin extra-territorial assasination kalpuite chu an dem leh duh loh thu an lo sawi tawh thin a ni.