Canada hmar tawp lama khawpui lian ber chu ram ngaw kangin a nuai thei dawna ngaih a nih avangin a chhunga chengte hmun hima thiarchhuahna kalpui mek a ni a.
Yellowknife, Northwest territories capital mi 20,000 vel chenna hmuna chengte chu Zirtawpni chhun dar 12 thlenga khawpui chhuahsan turin hriattirin an awm a.
Nimin thleng khan kangmei hian khawpui atanga 17km a thleng tawh a, hetih lai hian a bul hnai Hay River ah pawh kangmei dang a chhuak mek bawk a.
Northwest Territories chuan Thawhlehni khan state of emergency puang tawhin ram ngaw kang hmun 200 chuangah a chhuak mek a ni.
Shane Thompson, region’s environment minister chuan kangmei chuan chhiatna nasa zawk a thlen thei tia sawiin tun dinhmunah chuan Yellowknife khua tan a hlauhawm takzet tiin a sawi a.
“Tunah tut tut chuan a hlauhawm tihna a ni lo a. Mahse, ruah a sur lo a nih chuan kartawp lamah chuan kangmei hian khawpui pawn a thleng hman tawh ang” tia sawiin, “Khawpui tlanchhiatsan duh lo an awm chuan an nunna atan a hlauhawm a ni,” tiin a sawi bawk.
Hay River Mayor Kandis Jameson chuan mi 3,500 chuang chenna an khua chhuahsan vek tura hriattir an ni chungin mi 500 vel an la awn zui zel tiin a sawi bawk a.
Kangmei hian darkar khatah 30 km vel lai tuam hmanin thli na tak thawk bawk chuan kangmei hi a tizualkai chak tia sawi a ni bawk a. Hay River panna kawng chu hlauhawm tak a ni tawh tia sawiin mayor chuan eitur leh petrol supply an tlakchham tawh thu a sawi bawk.
Canada military te chuan tun hnaiah Northwest Territories’ South Slave Region-a chengte chu helicopter hmanga thiarchhuahna an lo nei tawh bawk a. Canada history a airlift evacuation lian ber an kalpui a ni.
Canada hian ram ngaw kang nasa ber a tawk mek a, hmun hrang hranga 1,100 dawnah ram ngaw kang a awm mek a ni. Mithiam te chuan kum dang aia khawro vang tiin kangmei chhuak tam chhan an sawi a ni.
Canada ram ngaw kangin zual lam pan
