Canadian Grand Prix a buai an ring lo
Tunlai hian nipui khaw lum lutuk avangin Canada ramngaw chu meialhin a tuam chhuak a ni ber a, hei vang hian June ni 18-a tlan tur Canadian Grand Prix dinhmun pawh der-thawng thei mai tura ngai an awm a, he boruakah hian Formula One chuan thuchhuah siamin, North America khawmualpui boruak chu Canada ram kang avangin la zing chuk rih mah se Montreal race-in a tawrh an rin loh thu an tarlang.
Canada ramkang avang hian New York khuaa Statue of Liberty pawh meikhuin tunlai hian a khuh nasa a, Canadian Grand Prix nghahna tur Quebec province hi meikhuin a tuam nasatna hmun a nih bawk avangin race a tihbuai mai an hlauthawng pawh hi thil awm tak niin a lang.
F1 chuan Montreal khaw boruak chu Cana-da ram hmun dang leh US ai pawhin a ziawm zawk tih an sawi a, Mon-treal bulhnai St Lawrence Seaway an tiha thliarkar pakhat Ile Notre-Dame tlankawngah hian a hun takah Canadian GP tlan theih a nih an beisei.
Karliamta khan Spa-nish Grand Prix an tlan a, season kal laia a vawi-ngana atan Red Bull driver Max Verstappen chak lehin, tunhnaia rawn chetha chho leh tan Mercedes driver pahnih Lewis Hamilton leh George Russell-te’n lawmman semna dawh-san dang pahnih an luah a; Verstappen-a team-mate Sergio Perez chu podium lawn pha lo chiaha palina a nih avangin driver standing lamah pawh Mexican Perez hian hmahruaitu Dutch driver hi point 53 zetin a pha lo tawh.
Tunkar tawp hi an chawl ang a, karleh, June ni 18 khian meikhuin ziaawm lam a pan zel chuan Canada ram lamah F1 driver-te an fuankhawm leh ang.
Canadian Grand Prix a buai an ring lo
