Candidate 23-in hming thehlut
November 7-a inthlanpui neih turah October 18 thleng khan din tum zinga candidate 23 chuan election hotute hnenah an hming an pelut tawh.
Election Commission ruahman ang chuan inthlan chuh tumte hian October 20 thleng hming an pelut thei a. Hetihlai hian party behchhan neia ding tur zingah October 18-a an candidate tur puang fel chauh te, October 19-a la puan tum te pawh an awm a. Official candidate puang tawh MNF leh INC bakah independent candidate thenkhat chuan nomination paper hi an thehlut tawh thung.
Nilaini bikah khan candidate 19-in nomination an file a, an zingah hian Tuichang bialtu MLA nilai Tawnluia, Tuikum bialtu MLA ni lai Er Lalrinawma, Kolasib bialtu MLA nilai K Lalrinliana, Serlui bialtu MLA nilai Lalrinsanga Ralte, Aizawl North III bialtu MLA nilai C Lalmuanpuia te an tel a. MLA nilai zinga a bial ngaia ding ta lo Robert Romawia Royte pawhin nomination hi file-in, a dinna tur Hachhek bial awmna Mamit district-a hming pelut hmasa ber a ni.
Bial hniha ding tur, Zoram Thar hruaitu, independent-a ding tur Rev Dr Zaichhawna Hlawndo chuan a dinna tur Hrangturzo bial atan Thawhtannia nomination paper a thehluh hnu ah Nilaini khan a dinna tur bial hnihna Aizawl South-III atan a thehlut leh a ni.
Thawhlehni khan mi pahnih – Aizawl South III MNF candidate leh bialtu MLA nilai Prof. F Lalnunmawia bakah Thorang bialtu MLA nilai, INC candidate Zodintluanga Ralte te chuan an bial ngai atan nomination an file tawh a. Thawhtanni khan Lengteng bialtu MLA nilai, MNF candidate Dr L Thangmawia leh Hrangturzo biala ding tur RevDr Zaichhawna Hlondo ten an lo file tawh bawk.
Inthlan chuh tumte tana hming pek luh theih hun hi bial tinah October 13 atang khan hawn niin, October 20 thleng hun hawn a ni a. Public holiday tih lohah chuan chawhma dar 11 leh chawhnu dar 3 inkar chhungin assembly bial returning officer emaw asst RO emaw hnenah hming hi pekluh theih a ni.
Candidate 23-in hming thehlut
