77th Cannes Film Festival an neih meka ‘Emilia Perez’ screening a tawp meuh chuan a entu mipui an ding suau a, kut an beng hluah hluah a, Cannes 2024-a standing ovation dawng rei ber a la ni. He film hi Cannes Film Festival-a chawimawina ngaihhlut ber Palme d’Or dawng thei tura rinkai a ni bawk.
Emilia Perez hi Spanish tawng hmanna musical drama niin, Zoe Seldana, Selena Gomez leh Karla Sofia Gascon te channa a ni a, a film hi veteran Jacques Audiard direct niin, Inrinni kalta khan premiere niin, a tawpah minute 11 chhung standing ovation a dawng a, a changtute performance leh a thawnthuin fak a hlawh hle a ni.
A film premiere-ah hian Saldana, Gomez leh Gascon bakah Edgar Ramirez te pawh an inlanna, an film channain chuti khawpa lawm a hlawh chu anni pawh a hnuk a ulh hial a, director Audiard hoa stage-ah lawmthu sawi tura an ding chhuak chu kutbeng thawm a ring lehzual sauh a, an tawp hleithei lo a ni ber mai.
Emilia Perez film-ah hian Rita (Seldana) chu ukil, dan bawhchhetu ten anmahni hum tura an hman thin law firm-a thawk a ni a, amah pawh a hlawhtling khawp mai. Mahse, ruihhlo tawlh ruk lama an hotu Manitas (Gascon) chuan a nunhlui kalsan a, nunthar nei a, hmeichhiaa insiam a duh tak hnuah thil a buai ta a ni.
Cannes 2024-ah Selena Gomez channa ‘Emilia Perez’-in standing ovation a dawng
