Card var ration buhfai lak man tih san chu MNF sawrkar laia pass tawh a ni tih ZPM party chuan an sawi a. Phuldungseia ration card paih sak chu Tripura lama khawl hmanga chhinchhiah a nih tawh avanga Mizoram atanga la tur anga chhinchhiah theih loh an nih vang zawk an ni tih an sawi bawk.
ZPM Gen. Hqrs. thuchhuak chuan, MNF Legislature Party-in ration buhfai kaihhnawihah mipui hriata thu dik tawk lo an pholang chu pawi a tih thu a sawi a. Sawrkar tharah politician inrawlh lohna State Purchasing Advisory Board (SPAB) kaltlangin chief secretary hoa buhfai supply-tu thlan a ni chu kalphung thar sawrkar rah chhuah nia an hriat thu a sawi.
Hetihlai hian, sawrkar hmasaah 2023 May 2 khan SPAB kaltlang loin, chief minister thu hmuin dan loin buhfai supply-na man uchuaka taka tihsan a ni, tiin, buhfai hi quintal-ah Rs 3025 atangin Rs 3400 a tihsan a ni a; chief minister-in a duhsak zawngte dan loa buhfai supply-na man a tihsan sak avanga sawrkarin sum a chawi belh chu quintal-ah Rs 375 a ni tih a sawi.
MNF MLA-ten buhfai man tihsan chungchanga sawrkar demna thu an auchhuahpui chu ram hruaina kawngah rilru mumal neih loh thlak an tih thu ZPM thuchhuah hian sawiin, ‘MNF sawrkar hnuaiah buhfai man tisang tur hian deputy chief minister kaihhruaina hnuaiah ‘Committee on matters relating to Non-NFSA Act 2013 (Above Proverty Line) benefeciaries and revision of issue price of non NFSA rice’ din a ni a; he Committee 2022 January 17-a thukhawm chuan, card var ration buhfai man tihpun chu a lo pass daih tawh zawk a, an meeting minute pawh en theih a ni,’ a ti.
Phuldungsei khuaa mithenkhat ration card paihsak nia sawiah ZPM chuan, India sawrkarin End to End Computerisation of Targeted Public Distribution System (TPDS) kalpuiin, he scheme-in management system hran a hman Ration Card Management System chu Adhaar card hmanga finfiah ngai a nih avangin adhaar pakhat chu ration card pakhatah chauh chhinchhiah theih a ni a, Phuldungseia mi thenkhat ration card chu Tripura lama lo register tawh a nih avangin RCMS khawl hmanga chhinchhiah theih an ni lo zawk niin a sawi.
‘Hnam inpumkhatna hi ZPM kaihhruai sawrkarin a ngaipawimawh em em a, Mizoram chhung leh pawna Zofate inpumkhatna tur hi ZPM kaihhruai sawrkarin mutmawh hnarmawha a neih mek a ni,’ a ti.
Thu belhchian dawl lo hmanga inpuh chu politics kalphung hlui a nih avangin Zoram mipuiin an ning tawh a, hei vang hian Zoramah kalphung thar, mipui sawrkar a lo pian phah ZPM thuchhuah hian a sawi a. Opposition party-te chu thudik tawklo hmanga mipui rilru kawihher tumna bansan a, thil tha tih kawnga inelpui atan a sawm tih a sawi a ni.
Card var buhfai man tih pun MNF sawrkar laia pass tawh – ZPM
