Mizoram sawrkar chuan vawiin, October 1 atang hian National Food Security Act-in a huam ve loh (non-NFSA), ‘ration card var’ hmang tan ration buhfai chu kg ah Rs.30-a hralh tan a ni dawn. Hetihlai hian Aizawl Municipal huamchhunga ration card ennawn kalpui mekah, report thehluh hun tura ruatah local council /veng tam zawkin an thehlut hman lo.Food Civil Supplies & Consumer Affairs minister B Lalchhanzova ruahmanna in, kum khat sum lakluh zat atanga chhuta khawsak harsaa ngaih ni lo, non-NFSA (card var) hmangtuten kg ah Rs.15-a ration buhfai an khul thin chu Rs.30-a tihsan a ni a; kum khat sum lakluh atanga chhuta khawsak harsa leh harsa tak tak – card pawl (priority house hold) leh card eng (AAY) hmangtute buhfai khulna man erawh tih danglam a ni lo.
Ration buhfai man, card var (non-NFSA) tana tih danglam hian card pawl (PHH) hnena mi pakhat tan kg.3 khul belh phalsak thin chu a tih danglam phah loa, he buhfai bika retailer-te lawmman (retailer’s margin) pawh a khawih danglam a ni lo.
FCS&CA department-in Aizawl khawpui chhunga ration card ennawn report thehluh hun tawp ni a siam – 2024 September 27 a nih laiin, September 30 thleng khan veng 34-in an thehlut a, veng 49-in NFSA report hi sawrkarah an la thehlut lo.
NFSA Committee hi mahni veng theuhah an thlan chhuah list mitinin awlsam taka an hmuh theihna hmuna tar chhuak tur leh vengchhung WhatsApp group darhzauah tarchhuak bawk tura tih an ni a, NFSA hnuaia awm phu, dinhmun harsate hmaih an nih loh nan sawrkar chuan theihtawp a chhuah mek zel tih FCS&CA director chuan a sawi.
September 30 thlenga DCSO Aizawl East leh Aizawl West-a report luh danin, mitthi tawh ration card atanga paih tur hi AMC area-ah mi 1139 hmuh chhuah an ni tawh a, thla ruk chhung ration la khul miah lo chhungkaw 6500 vel hmuhchhuah tawh niin, heng ho hian ration lak an mamawh lo nia ngaih an ni. Heng zinga NFSA quota la te aiah hian NFSA mamawhtute dah luh an ni ang.
Lunglei Municipal-a local council 24 atangin mitthi tawh 1177 hnuhchhuah an ni tawh a, endik mek zel a ni.
8 2024 October 1 atang hian Mizoram sawrkarin retailer lawmman kg khat zela duli (paise 50) a pek thin chu Rs 1.50 ah a tisang dawn.
8 NFSA buhfai bikah kg khatah Rs 1.35 zel retailer-ten sawrkar laipui atanga lawmman an dawn thin bakah Mizoram sawrkar chuan kg ah Rs 1.50 a pe bawk dawn. A hma chuan kg ah paise 45 a pe thin.
8 Ration card ennawn mek chu Aizawl Municipal pawn lamah pawh kalpui a ni dawn a, October atang hian tan a ni ang.
8 Ration card ennawn hi dik taka kalpui a nih theihnan sawi tur leh complaint duh nei chuan NFSA chairman, an bialtu DCSO ah thlen thin turin mipui chah an ni.
8 Mizoramah ration card nei chhungkaw 287932 awmin, heta mihring awm zat chu 1169048 a ni.
8 Card eng (AAY) 25861, card pawl (PHH) 150532 leh card var (non-NFSA) 111539 a awm a. AAY ah hian mihring 64123, PHH ah 640992, non-NFSA ah 469765 an awm.
8 AAY chhungkua hian thla khatah a thlawnin buhfai kg.35 an dawng thei a, PPH-a awmten mi pakhat tan a thlawnin kg.5 zel dawng theiin, mi pakhat tan kg 3 zel Rs.15-in an khul thei bawk.
Card var tan buhfai man sang tan Ration card ennawn thlawp tha lo
