Cardi B-i’n a fapa laihrui gold pendant-ah siam
Hmeichhe rapper hriathlawh Cardi B chuan November ni 4 khan a ngaihzawng Stefon Diggs nen fapa an nei a, a nau neihnaa naute laihrui (umbilical cord) chu paih mai lovin heart-shaped gold pendant-ah a siamtir a, heti hi chuan a dahthat reng theih tawh dawn bakah a duh changin tlereuh angin a inbel thei dawn bawk a ni.
He gold pendant hi Mommy Made Encapsulations neitu Juliane Marie Corona design niin, laihrui an zai chah hi paih mai lovin, heart-shape in an siam a, chu chu an tiro (dehydrate) a, chumi hnuah rangkachakah an chiah leh ta a ni.
Hetianga an siam vel lai thlalak hi Juliane hian Instagram-ah post-in, “A nun bul tanna chu vawng thain, kumkhua atan a dahtha thei tawh dawn a ni. Laihrui hi nu leh naute inzawmna hmasa ber, naute tana nunna hnar, a thanlen theihna, amah venghimtu leh nu pum chhunga a awm chhung zawnga a mamawh zawng zawng a hmuhna a ni,” a ti.
Cardi B hian 2024-a a fa pathumna a neih pawhin a naute thar a nau neihnaa nauhlam (placenta) pawh paih mai lovin damdawi capsule anga ei mai theih turin a siamtir tawh bawk.
Cardi B hian a pasal thentak Offset nen fa pathum- Kulture, kum 7, Wave, kum 4, leh Blossom, thla 14 te a nei tawh a, Stefon nena an fapa hi a fa palina a ni.
Cardi B-i’n a fapa laihrui gold pendant-ah siam
