Carey-i’n Video Vanguard Award dawng dawn

Carey-i’n Video Vanguard Award dawng dawn
MTV Video Music Awards (VMA) a chawimawina ngaihhlut hlawh tak Video Vanguard Award dawng turin Mariah Carey thlan a ni a, September ni 7, 2025-a MTV VMA show-ah award hi hlan a ni ang.
Carey, kum 56, hi he award dawng tawh zinga upa ber a ni dawn a, a hmaa he award dawngtu zinga upa ber chu Richard Lester, kum 52, a ni a, ani hian 1984-a VMA an sem hmasak ber tumin he award hi a dawng. Tun hnaiah he award dawngtu te hi an kum a naupang zawk zawk lo thei ta riau a, Jennifer Lopez, Missy Elliott leh Shakira te pawhin he award an dawn hian kum 45 an pel vek tawh.
MTV VMA-ah hian Video Vanguard Award hi kum sarih chhung chu hmeichhe lamin an dawng zawn char char tawh a, Rihanna (2016), Pink (2017), Lopez (2018), Elliott (2019), Nicki Minaj (2022), Shakira (2023) leh Katy Perry (2024) ten an dawng a, 2020 leh 2021 chu COVID-19 hripui avangin award sem a ni lo. Kuminah Carey-i’n a dawng leh dawn bawk a, kum riat chhung a zawnin hmeichhe lamin he chawimawina an dawng dawn ta a ni.
Carey hi VMA stage-ah a inlan lo rei ta ngar ngar viau mai a, kumin hian award a dawn bakah stage-ah a perform nghal dawn a, kum 20 chhunga VMA stage-a a inlan lehna hmasa ber tur a ni. 2005 khan MTV VMA-ah a hla hit ‘We Belong Together’ leh ‘Shake It Off’ a perform a, hemi hnuah hi chuan VMA stage-ah a inlan leh ta lo.
Carey hian 1997 khan Video Vanguard Award hi LL Cool J hlantuah a lo tang tawh a, kumin MTV VMA show hi LL Cool J hian a host ve leh thung dawn a ni.
VMA stage-a Carey inlan hmasak ber chu 1991 kha niin, “Emotions” a perform a, 1998 khan Whitney Houston nen show hawngtuah an tang dun a, hemi tum hian inhre lawk miah lovin kawr inang an ha nghe nghe a ni.
Mariah Carey hi rimawi kawvelah kum 30 chuang a lo tal ve tawh a, hetih chhung hian Billboard Hot 100 (US singles) chart a No.1 kai thei hla 19 nei tawhin, he chart-a a hla No.1 kai hmasa ber chu June 1990-ah ‘Vision of Love’ niin, a No.1 hnaivai ber chu kumin January khan a hla “All I Want for Christmas Is You” a No.1 leh bawk. A hla 19 No.1 kai thei zinga hla 18 chu ama phuah leh midang nena an phuahho a ni. Carey hi solo artist zingah chuan Billboard Hot 100 chart-a No.1 kai thei hla ngah ber niin, solo chauh ni loah pawh The Beatles chiah a pha lo a, chu pawh hla khat chauhin.
Mariah Carey hi Songwriters Hall of Fame-ah 2022 khan lak luh niin, Rock & Roll Hall of Fame-a pawh tun kum hnih chhung hian a zawnin nominate a ni tawh a, kum tharah te hi chuan Rock & Roll Hall of Fame-a lak luh tur pawhin an thlang tawh ngeiin a rinawm.
Billboard 200 (albums) chart lamah pawh No.1 kai thei album paruk nei tawhin, Grammy Awards panga a dawng tawh bawk. A album thar ber, a studio album 16-na tur “Here for It All” pawh kumin September thla hian tlangzarh a ni dawn a, he album atanga a single ‘Type Dangerous’ chu kumin VMA-ah hian besr R&B-ah nominate a ni a, award a dawng hlauh a nih chuan competition a VMA a dawn hmasak ber a ni ang. Carey hian kuminah Video Vanguard Award a dawng dawn nain, MTV VMA award pangngai hi a la dawng miah lo tlat lawi si a ni.
Kumin MTV VMA-a hian Busta Rhymes chu MTV VMA Rock the Bells Visionary Award hlan a ni dawn a, Ricky Martin pawh Latin Icon Award hlan a ni ang. Latin Icon hi an vawi khat pekchhuahna tur a ni.
Kumin MTV VMA-ah hian Lady Gaga-i’n nomination ngah berin, 12 a nei a, ‘Die With a Smile’ hlaa a thawhpui Bruno Mars-a’n dawtin, nomination 11 a nei a, Kendrick Lamar (10), ROSE (8), Sabrina Carpenter (8), Ariana Grande (7), The Weeknd (7) leh Billie Eilish (6) te pawh a langsar pawl an ni.