Cash management-a che
tha pawlah Mizoram tel – RBI
Reserve Bank of India hotute chuan Mizoram chu state ho zingah cash management-ah a che tha pawl a ni a. Tunhnaiah a overdraft loa, state IFMIS kaltlanga e-Payments ah hmasawnna an hmuh hnem rualin, e-Receipts ah tan lak a ngai tih an sawi.
Reserve Bank of India (RBI) in December 15 – 17 chhunga Mizoram sawrkar hnuaia finance officer-te tan government banking leh accounting chungchang zirna a buatsaihah heng thu hi an sawi a. Mizoram official-te chu SNA SPARSH atana hman tur RBI account a rang lama siamsak an tum thu hrilhin, system thar hrang hrang hman a nih avanga state hoin harsatna an tawh chungchangah thawh ho a, chinfel thuai an inpeih tih an sawi a ni.
Workshop hi sawrkar sum enkawl, accounts kalphung, digital payment system, cash management leh public debt management lamah state sawrkar official-te hriatna leh thiamna tizautu atana tih a ni a. Chhawng hniha neih niin, chhawng khatna hi Mumbai RBI office hnuaia ‘Department of Government Banking & Accounts’ (DGBA) ah, chhawng hnihna hi Nagpur-a RBI hmunpui ‘Central Accounts Section’ (CAS) ah neih a ni.
DGBA Mumbai-ah hian central leh state sawrkar tan RBI chu banker an nih dan zir niin, RBI hmalakna lian tak ‘e-Kuber’ khawl hmanga ‘e-Payments’ leh ‘e-Receipts’ kalpui dan, sawrkar laipuiin CSS sum pekchhuahna atana kalphung thar a duan, ‘SNA SPARSH’ chungchang leh Open Market Borrowings (OMB) an kalpui dan inzirtir a ni.
CAS Nagpur-ah hian RBI-in India ram puma ‘inter-governmental transactions’ a kalpui dan, sawrkar laipui leh state sawrkar hrang hrang accounts vawn dan, RBI-in bond market a state-te tan investment a kalpui dan leh Consolidated Sinking Fund leh Guarantee Redemption Fund hmanga sum enkawl a nih dan zirtir a ni.
Heng hmalakna thar hian sawrkar sum vawndik leh sum enkawl chungchangah hmasawnna a thlen beisei a ni.
RBI chief general manager Sivakumar Bose, general manager hrang hrang leh staff dangten presentation an pe a. Mizoram sawrkar aiawhte hi Finance deputy secretary Rosiamliana’n a ho a ni.
Cash management-a che tha pawlah Mizoram tel – RBI
