Cashless-in mi 12917
enkawl tawh
June 24 thleng khan Mizoram Universal Health Care Scheme (MUHCS) a inziaklut damlo 12917 chu cashless-a enkawl an ni tawh tih sawi a ni.
Thawhtanni khan Health & Family Welfare minister Lalrinpuii chuan MUHCS zawm thar private hospital pathum – Nazareth Hospital Chaltlang, Nazareth Hospital Ramhlun North leh Redeem Hospital College Veng a tlawh a. MUHCS zawmtu Kidney 360° Superspeciality & Diagnostic Centre Bazar Bungkawn a tlawh bawk.
Mipui hmakhua ngaia private hospital pathum leh Kidney 360° Centre-in ke an pen chhuak chu lawmawm a tih thu a sawi a. MUHCS la zawm remchang ve rih lo te pawh sawrkarin a nghak reng a, engtiklai pawhin an inhawng tih a sawi a ni.
“MUHCS hi mi zawng zawng tana duan a ni a, hemi tihlawhtling tur hian sawrkar hospital hrang hrang thuamthat chhoh mek a ni. Sawrkar hospital chauh chuan mipui min dawl zawh loh avangin private hospital-te an pawimawh a, mipui rawngbawlna a ni tih hria a, MUHCS zawm zel turin private hospital ka sawm nawn a ni,” a ti.
Health minister sawi danin, June 30 thleng khan health care zawmtu (beneficiaries) chhungkaw 292849 an awm a. ABPMJAY-ah 219002, sawrkar hnathawk 55470, pensioner 9310 leh mipui (general beneficiary) 9069 an ni. Damlo bill kartin pek chhuah niin, June 24 thleng khan mi 12917 hnenah Rs.15,12,17,890 pek tawh a ni.
Kidney 360° Dialysis Centre-ah hian dialysis khum 6 a awm a, MUHCS hnuaiah cashless-in damlo 595 an enkawl tawh. Nazareth Hospital leh Redeem Hospital-ah hian general ward, semi cabin leh private cabin a awm a ni.
Cashless-in mi 12917enkawl tawh
