CBI koh luhna tur case awm MNF sawrkarin a ko ngam lo
– Dr Lalmalsawma
Mizoram Lok Ayukta chuan CBI (Central Bureau of Investigation) koh luhna tur case pahnih a nei tawh a, MNF sawrkarin a ko ngam lo tih Congress treasurer Dr Lalmalsawma Nghaka chuan a sawi.
“Sawrkar Tha leh Kalphung Dik” tih thupui hmanga Congress Thalai Hqrs. in Inrinnia Aizawla street campaign a huaihawt hmanpuitu MPCC treasurer chuan Congress sawrkar kalta in bul a tan Lok Ayukta chu MNF sawrkar chuan hna thawk tak tak thei turin an siam duh loa, Lok Ayukta-in CBI koh luh theihna tur case pahnih a neih tawh pawh MNF sawrkar hian a ko lut ngam lo, tiin a sawi. Congress a sawrkar leh rualin Lok Ayukta hi a aia nasa in an thuam chak anga, an thawh tur dik tak an thawh tir dawn tih a sawi a ni.
Congress president Pu Lalsawta hoin ‘tang puihna’ hmangin, tang tak tak leh theihtawp chhuahtute tan hma an la dawn tih a sawi a. “Hei hian hausak thut lam a kawk loa, Congress party chu mithenkhat anga suangtuahna a thleng tak tak emaw tia phur leh thiam taka sawi chi kan ni ve lo. Sawrkar leh mipui inlawm tawnin tangtlang ila, tun aia ram nuamah Zoram hi siam ang u kan ti a ni,” a ti.
Lok Sabha MP inthlan neih tur chu Mizo hnam leh sakhaw dinhmun sawinghing vek thei a ni tih Dr Lalmalsawma Nghaka hian sawiin, “Thlamuang takin kan awm emaw kan tih lai hian, kan hnamzia leh kan sakhua thlengin nekchepin kan awm mek a, nekchepin kan awm mek tih hre lo tam tak kan awm mek bawk. Harh a hun takzet a, kumin inthlanpui kan hmachhawn turah hian ngaihtuahna fim hmang a, duh thlang sual lo turin Zoram mipui ka sawm a ni,” a ti.
CBI koh luhna tur case awm MNF sawrkarin a ko ngam lo – Dr Lalmalsawma
