Cement pawlh dal venpui turin company lam chah

Valley Strong Cement siamtu company hotute chu cement pawlh dal a awm loh nan venpui turin Central YMA hruaitute chuan an chah.
Barak Valley Cement Limited vice president (Sales, Transport & Mines) Vimal Kumar Sharma leh North East Region manager Bipul Baruah bakah Zone manager (Mizoram) Lalramliani Ralte te chuan Thawhtanni khan Central YMA office-ah Central YMA hruaitute an kawm a. President Lalhmachhuana, general secretary Prof. Malsawmliana, treasurer Roneihthanga bakah finance secretary MS Ralte ten an lo dawngsawng.
Barak Valley Cement Ltd hotute chuan mipui vantlang tana Central YMA hnahthawh thin chu an hriatpui thu leh an hnathawh ropui an tih zia an sawi a. An company chuan YMA hnathawh kawng hrang hrangah an thlawp tlat tih an sawi a ni.
Central YMA hruaitute chuan cement pawlh dal leh buk tling lo an duh loh thu leh hetiang a awm loh nan theihtawp an chhuah thin thu an lo hrilh a. Cement pawlh dal leh buk tling lo a awm loh nan theihtawpa hma la turin an chah.
Barak Valley Cement Ltd hotute chuan an company CSR fund atangin Central YMA nen Mizo thalaite infiamna liantham tak huaihawt an inhuam thu leh an company senso veka Mizoram atanga an company factory hnai ber Badarpur Assam ami chu hmun hrang hranga YMA hruaituten a hmunah tlawh saka zin turin an sawm tih an sawi a ni.
Company hotute sawi danin, tunah Barak Valley Cement Ltd hian Mizoramah stockist pali neiin dealer leh sub-dealer 250 chuang an nei a, thlakhatah Valley Strong Cement bag nuai 250 – 300 vel an hralhchhuak thin a ni.