Zan khat riaka Mizoram tlawhtu Tokhan Sahu, minister of state for housing & urban affairs chuan, ‘Nal Se Jal’ hnuaiah Mizoram sawrkarin an thlen chin report a pe mumal thei lo tih sawiin, mak a tih thu a sawi a. PMAY- Urban ‘in sak tanpuina’ la dawng kim lo an awm te, a hlawhtlinna zaa 30 chauh a la ni chu a ngaimawh tih sawiin, 1st instalment chauh dawng leh, dawng tura tih la dawng si lo, chenna in lo thiat tawhte chu sawrkarin ngaihven turin a chah tih a sawi bawk a. Sawrkar laipuiin scheme a siam hmanga ram leh mipui tana hmasawnna tur hna thawh zinga zawh tawh nia sawi chu Central Team-in a endik leh phawt hma chuan zoah an pawm ve lo tih a sawi bawk.
Minister-in a sawi ‘Nal Se Jal’ hi Jal Jeewan mission hnuaia component pakhat a ni a. He mission hian a tum ber chu, kum 2024-ah chuan thingtlang khua zawng zangin an chenna inah herh haw theih (tap water) tui an lalut vek tawh tur a ni a, mi pakhatin ni khatah tui litre 55 tal an dawng thei tur a ni, tih a ni tawp mai.
He scheme hi 2019-a hawn (launched) kha a ni a, kumin 2024 hi a kum 5-na a ni a, chuti chung chuan Mizoram sawrkarin a thlen chin report a pe mumal thei lo niin sawrkar laipui lama kan minister hian a sawi mauh mai. He thu hi minister hian min rawn kalchilhin kan state leilung a rah lai ngeia a sawi a ni a, Mizoram sawrkar emaw, a kaihhnawih department emaw hian MoS for HUA thusawi hi an react rih lo niin a lang a, sawrkar thuneitute hian an sawifiah dawn nge, an ngawi ral mai dawn? A pawimawh nasa mai si a, mipui hian thil awmzia hriatchian hi kan right a ni a, kan right hi sawrkar hian a ngai pawimawh dawn em tih te pawh a hriat zui zel turah i ngai phawt mai ang u.
State pachhe tak kan nih thu hi chu kan ram hruaitute hlei hlei hian an sawi nasa a, thawhchhuah nei mumal lo kan nih dan te pawh mipui lam chu min hrilhfiah peih khawp mai. Heti chung hian, sawrkar laipui scheme tha tak tak, state sum seng ve mang lova kalpui theih chi tam tak a awm a, chung scheme-te chu Mizoram pawhin kan dawng ruih ruih a. ‘Cheng sawm thawh ula, keinin cheng sawmkua kan thawh ang’ emaw, ‘chengkhat mah in thawh ve ngai lovin kan rawn tumsak vek ang che u’ emaw an rawn ti lawm lawm a, chuti chung chuan keini lam chuan kan lo ‘lu pân hnathawh’ khum mai mai a, an rawn endik a, 30% chauh te kan lo la thawk leih leih a, kan tana tha tur pawh kan lo la ti peih mang lo chu a ni ber awm e.
Mihring tlemte kan ni a, sawrkar laipui scheme tha pui pui mai hi a nihna tur angin hmang ila chuan, India rama state hmasawn ber leh changkang ber nih theihna chance kan nei sang hle a ni. Tun sawrkar thar hian central scheme hman tangkai a tum viau niin a lang a, tan han la tak tak teh se.
Central scheme leh Mizoram
