Central Vista project-a thing phun 43% vel thi
Narendra Modi-a sorkarin Rs. vaibelchhe 20,000 man Central Vista project atana a thing phun zinga 43% vel chu a thi niin Lok Sabha inkhawmah Ningani khan sawi a ni.
Sorkar laipui chuan a vaiin thing 3,609 an phun a, heng zinga 1,545 chu phun hnuah an thi niin a sawi a ni.
Transplantation bakah sorkar laipui chuan compensatory plantation atan a vaiin thing 24,450 phun a nih thu a sawi a. Trinamool Congress (TMC) MP Mohua Moitra-i zawhna chhangin Union Minister of State for Housing & Urban Affairs Tokhan Sahu-a chuan, “NTPC ECO Park, Badarpur-a thing 24,450 leh Ghitorni-ah thing 1,730 chu compensatory plantation hnuaiah phun a ni,” a ti.
Sorkar laipui chuan tangka thum kalta chhunga heng hmalakna hrang hrangah hian sum Rs. vaibelchhe 5.29 hman a nih thu a tar lang bawk.
Central Vista Project atana thing phun tam ber chu CCS (Common Central Secretariat building, a hnuah Kartavya Bhawans tia vuah) 1, 2, leh 3-ah a ni a, thing 1,734 an phun a, CCS 6 leh 7-a hmun 7-ah thing 458 phun a ni a. Parliament Building thar hmunah hian 402 phun a ni a, VP Enclave hmunah 390 phun a ni bawk.
Badarpur-a NTPC ECO Park chu thing phun tam berna hmun a ni a. Hmun dangte chu Ghata Masjid leh Krishna Menon Marg te a ni a, Executive Enclave (PM office/Seva Teerth)-ah 342 an phun a ni.
Central Vista project hi zawh fel tep niin hripui leng vangin tihkhawtlai a ni a, environment leh ram hman dan clearance chungchanga buaina a awm avangin dan lama rinhlelhna pawh a tawk a, Supreme Court thlen a ni.
December, 2020 khan Supreme Court chuan environment clearance chungchangah dan anga dodalna a awm chung pawhin sorkarin a sak hna a tan tawh tih a hriat thu a sawi a, Central Vista hmalakna chu court thutlukna siam hma chuan tihtawp turin sorkar a hriattir a; mahse, project hian court sang ber atangin January, 2021 khan thawh chhunzawm phalna a dawng a ni.
Central Vista project-a thing phun 43% vel thi
