Central YMA leh LC thawhdunna

Sairang thleng rel service a awm ta a, thil chi hrang hrang buaipui tur a tam ta hle; chung zingah chuan ‘ILP’ leh ‘dan kalha hnam dang sumdawng’ te hi a langsar deuh awm e. Hei hi Central YMA leh Aizawl City Local Council hruaitute chuan an vei a, nimin khan hemi chungchanga hmalak dan tur relin an thukhawm nghe nghe a ni.
State dang atanga rel hmanga Mizoram lo lut, ILP pumpelh duh vanga kawnglaka rel tlan lai atanga zuang chhuak an awm thin niin tun hnaiah thu dawn a ni a. Rel hi, Sairang rel station a lo thlen hma hian muang takin a tlan thin a, rel a tlan muan lai chuh hian station thlen hmain mi thenkhat an zuang chhuak thin nia sawi a ni.
He thil thleng finfiahna (video/photo etc.) hi hmuh tur a la awm chiah lo a nih pawhin, sawi rik ret ret a awm tawh chuan, thil thleng thei a nih avangin, a finfiah tura hmalak hi thil pawimawh tak a ni ve awm e.
Hei hi thil awm thei a nih avangin, Central YMA leh Local Council thawhdunna hi a pawimawh dawn hle a. YMA chu sawrkar rawng kai lo a ni a, chutih laiin kut leh ke ngah zawk a ni. Khawtlang inrelbawlna kawnga khawpui sawrkar AMC hnuaia thuneihna neia din local council nen thawhdunna tha tak a awm theih phawt chuan, ILP leh dan kalha hnam dang sumdawngte buaipui hna hi YMA leh LC hian chak takin an thawk thei a ni.
Entirnan: Tuna ILP chungchanga thuthang awm mekah pawh hian, ILP nei lote hian Aizawl leh a chhehvelah hian an thiante belh tur an nei vek ngeiin a rinawm a. Hnam dangte hi mahnia in leh lo nei lo an nih avangin mi in an luah ngei ngei a ngai a. An in luah neitute hi YMA leh Local Council te chuan census an neih thin atangin an hre vek tura ngaih a ni bawk. Hnam dang, ILP holder, mi in luaha awm mekte hi record felfai tak a awm a nih chuan, dan kalha lo lut rute an lo mikhual em, an lo hum ru em tih zawnchhuah chu thil harsa lutuk a ni tawh awm lo ve.
Dan kalha hnam dang sumdawng tihte pawh hi, kan duh tak tak chuan kar lovah man chhuah vek theih a ni. A nihna takah chuan, dan dik lo tak hmanga hming hawhtira hnamdang lo sumdawn puitu Mizote hi hmaizah deuh bik kan nei thin a ni mai lo maw(?) a tih theih awm e. Kum hei leh chen, MZP, YMA leh sawrkar ten an lo buaipui tawh a, dan kalha hnam dang sumdawng kan la tireh thei lo hi chu, ‘kan tum tak tak loh vang’ a ni deuh ber tawh awm e.