Centre 11 ah sang chuang enkawl
Kum khat kalta chhung khan Mizorama de-addiction centre 11 ah mi 1006 enkawl an ni.
Social Welfare & Tribal Affairs minister Er Lalrinawma’n ruihhlo leh a kaihhnawi chungchanga hmalakna a sawi danin, sawrkar laipui Ministry of Social Justice & Empowerment chuan state level coordinating agency (SLCA) atan Mizoram Social Defence & Rehabilitation Board (MSD&RB) a thlang a, zirna in leh thawktute ah zirtirna inpek thlengin thawhho a ni.
De-addiction Centre 11-ah April 2022 atanga March 2023 chhung khan mi 1006 enkawl an ni a; counselling vawi 16920 pek an ni.
“Kan thalai duhawm tak takten ruihhlo vangin mual min liamsan a, tam tak ramtuileilo enkawl ngaiin an awm reng bawk. Hengte avang hian ruihhlo la ti ve lote vennhimna atan MSD&RB, Social Welfare & Tribal Affairs Department nen naupangte an kum mila zir tur ‘Modules on Prevention of drug use’ buatsaihin, DIET lecturer 24 chu training pek tawh an ni,” a ti.
DIET lecturer-te hian district hrang hranga high school leh higher secondary school-a zirtirtu mi 245 hnenah zirtirna pe chhawng leh tawhin, hengte hian anmahni school theuhah zirtirna an kalpui mek tih Social Welfare minister hian a sawi a. Hemi rual hian kum 10-17 inkar naupangte ruihhlo chungchanga zirchianna ‘Drug and Children Survey in Mizoram 2022’ neih a nih thu sawi bawk.
Ruihhlo dona atana committee lo awm tawh sa chu chief minister Pu Zoramthanga hmalakna in tharthawh leh a nih thu te, he Ruihhlo Do Committee hian chak zawka hma a lak theih nan finance changtu chief minister chuan cheng vaibelchhe 3 hman phalsakin, tunah sum hi sanction tawh a nih thu te a sawi.
He committee hian supply reduction, demand reduction leh harm reduction chak zawka kalpui tumin, Mizoram pumah hma a la mek tih sawiin, “District tinah deputy commissioner chairman-na hnuaiah District Level Task Force din a ni a, an ni kaltlang hian district leh village level-ah ruihhlo do kawngah chak taka hma lak tum a ni,” a ti.
Centre 11 ah sang chuang enkawl
