Centre-in na taka a nawr zarah Engineering College bul tan tum – Joseph Lalhimpuia

Centre-in na taka a nawr zarah
Engineering College bul tan tum
– Joseph Lalhimpuia
Lungleia Engineering College bul tanna tur chu an sawrkar hnua sawrkarten hlamchhiah lui mah se, sawrkar laipuiin na taka a rawn nawr tak avangin tunah hian a taka kalpui tuma bawhzui mek a ni tih Congress sawrkar laia Higher & Technical Education chang thin parliamentary secretary hlui Joseph Lalhimpuia chuan a sawi.
Kar kaltaa Congress Bhavan-a thu a sawinaah MPCC general secretary Joseph Lalhimpuia chuan, an sawrkar lai, kum 2014-ah RUSA component 6 (new professional college) of RUSA 1.0 hnuaiah college pali tan project thehluh a ni a , heng zing ami Lunglei Engineering College din chu RUSA Project Approval Board chuan pawmpuiin, cheng vaibelchhe 26 a pe nghal a. Pukpui khawtlangin ram acres 24.9 a thlawna pe in, college building hi 2016 April 22-a sa tanin, 2018 November 16-a sak zawh a ni a. PM Modi chuan 2019 khan a hawng a, 2019- 2020 academic session chhunga class tan hman turin a hriattir nghal tih a sawi a ni.
A hnua MNF sawrkar khan department lamin budget-a dah an dilna, NEDP balance an dilna, 14th Finance Commission-a an dilna, Planning department kaltlanga NESIDS-a an dilna, NEC leh Special Assistance to State for Capital Expenditure atanga an dilna a tihlawhchham fai vek a, state sawrkarin priority dan azira pek theih vek a ni. An sawrkar chhunga an tihhlawhtlin chu 2023 tir lama boundary pillar phun zawng a ni mai tih a sawi.
“Mizoram Engineering College chungchangah MNF party hian Zoram thalai leh chhimlam mipui hnenah ngaihdam dil rawh se” Joseph Lalhimpuia hian a ti.
Sawrkar laipuiin sum tam tak a pek, PM Modi hawn tawh la hlawhtling lo tihlawhtling tura state sawrkar na taka centre-in a rawn nawr tak avangin, 2024 December 28 khan chief minister hoin meeting an ko chuk chuk a, 2025 April 13-a cabinet meeting chuan thawktu 65 lak a remti a, kalkawng, eng leh tui bakah building repair leh tul dang atan ruahmanna an siam zui bawk, tiin, lawmawm a tih thu MPCC hruaitu hian a sawi.
“Congress party hmalakna, PM meuhin a hawn tawh, kum 7 hlamchhiah a nih hnuah chhunzawm a ni leh tur hi Congress party chuan lawmawm a ti takzet a, a hlawhtlinna hmuh thuai kan beisei a ni,” a ti.