NDA sorkar chuan kum 21 chhung lai hman tawh leh India civil services pension system Atal Bihari Vajpayee sorkar laia an reform tawh chu thiatin Old Pension Scheme nena inang tak ‘Unified Pension Scheme’ (UPS) chu hman turin an tlangzarh a, he scheme hnuaiah hian sorkar hnathawkte chuan an pension hmaa an hlawh lak hnuhnun ber atanga 50% chu pension atan an la zui thei tawh dawn a ni.
UPS hi Union Cabinet chuan August 24, 2024 khan a pawm fel ta a, inflation trend milin dearness relief tihsan thin a ni ang a, sorkar hnathawk an boralin a chhung ten family pension 60% la thei dawnin retirment dawnah gratuity benefits lumpsum superanuation payout a la thei dawn bawk a. Hei mai bakah hian central sorkar hnuai hnathawk kum 10 chuang service tawh te chuan a tlem berah pension thla tin Rs 10,000 an la dawn bawk.
Sorkar hnathawkte tana National Pension System (NPS) [New Pension Scheme tia hriatlar] chungchangah hian March 2023 khan Finance Secretary hlui leh Cabinet Secretary-designated T.V. Somanathan kaihhruai committee din niin an rawtna te chu Cabinet chuan a pawmfel ta a ni.
Committee din a nih lai khan Opposition rorelna state panga te chuan NPS hnawlin an hnathawk te chu Old Pension Scheme (OPS) an pension ruala an hlawh lak hnuhnun ber atanga 50% lak theihnaah an luhpui vek hman a ni. NPS-ah kha chuan January 1, 2004 atanga sorkar hnaa lutte chu hrut rual tel vek an ni thung a. Contribution anga kalpuiin chung te chu equity leh market-linked security ah Pension Fund Regulatory and Development Authority (PFRDA) te chuan an invest sak thin ta a ni.
Tuna UPS Union Cabinet-in a pawm tak hi April 1, 2025 atangin State tena an duh a nih chuan an hman tan theih tur a ni bawk a. Somanathan chuan OPS leh UPS danglamna ber chu OPS chu liabilities niin employees emaw employer ten emaw contribution an neih loh a ni a ti.
UPS erawh contributory scheme ni dawnin sorkar hnathawk te chuan an hlawh atangin 10% pein sorkar in 18.5% a tum thung dawn a ni, a ti a. Somanthan chuan employees’ contribution chu 10% ah frozen a ni ang a, sorkar contribution erawh UPS promise tihlawhtling turin a tul angin tihsan emaw tihhniam emaw theih a ni ang a ti thung.
NPS chu a duh tan chuan la hman theih tho a nih dawn rualin sorkar hnathawk kum 2004 atanga zawm te emaw lo pension tawh te pawhin UPS an zawm remtihsak an ni dawn a, Somanathan chuan NPS member 99% te chuan UPS an zawm chuan hlawkna an tel ang a ti. Chu mai bakah employee te chu an retirement rualin gratuity benefits bakah lumpsum payment tiam an ni bawk a. He lumpsum hi an monthly emoluments atanga 1/10th a ni ang a ti bawk.
“Ram hmasawn nana thawktu sorkar hnathawkte thawhrimnaah lawmthu kan sawi a ni. Unified Pension Scheme hian zahawmna leh financial security sorkar hnathawkte a pe dawn a ni” tiin Prime Minister Narendra Modi chuan a sawi zui a.
Central Secretariat Service Forum te chuan thuchhuah an siamah sorkar chuan NPS thatlohna a hrefiah chiang ta tia sawiin UPS chuan assured pension a neih avangin a tha zawk an ti bawk a. Mahse, forum te chuan OPS hman chu an duh bur leh ngiat ber a ni tih sawiin UPS hmanga an salary deduction chu an duh lo an ti zui thung.
Shiv Gopal Mishra, secretary of the Joint Consultative Mechanism (JCM) central leh a hnathawkte inkara palai tu ber chuan UPS hman tur chu lawmawm an tih thu sawiin Prime Minister chuan hnathawk te nena thawhhona tha zawk awm se a duh thu a hrilh tiin a sawi bawk.
All India Defence Employees Federation general secretary C Srikumar chuan, “Hei hi kan lungawilohna rahchhuah a ni a. Mahse, kan hlim kim lo. UPS hi non-contributory a ni tur a ni” tiin a sawi a, zirchianna an la kalpui tur thu a sawi bawk.
UPS key features?
Assured Pension
Sorkar hnathawk kum 25 ai tlem lo service tawhte chuan an pension hma thla 12 chhunga an basic pay atanga 50% lawih pension nan an hmang ang. Kum 25 aia tlem service te pawh an service mail her rem tur niin minimum qualifying service chu kum 10 a ni thung.
Assured Family Pension
Vanduaithlak taka sorkar hnathawk a thih chuan a kawppuiin family pension a la ang a, a thih hmaa a hlawh lak atanga 60% pension ah lak theih a ni ang.
Assured Minimum Pension
Sorkar hnathawk tu pawh kum 10 service tling tawhte chuan an pension hunah Rs 10,000 pension atan an la tling hrim hrim dawn a ni.
Inflation Indexation
Assured pension leh family pension te chu inflation indexation mila kalpui tur a ni bawk a. Hei hi inflation san leh hniam dan mil zela siamremna tur a ni.
Dearness Relief
Sorkar hnathawk mekte ang bawkin UPS hnuaia retirees te chuan All India Consumer Price Index for Industrial Workers (AICPI-IW) behchhanin Dearness Relief an dawng ang.
Lump Sum Payment on Superanuation
Gratuity bakah employees te chuan superranuation-a an chhuah rualin lump sum payment an dawng ang. Payment chu sorkar hnathawk monthly emolument atanga chhutin 1/10th a ni dawn a, lump sum payment chuan assured pension a tihniam dawn chuang lo bawk.
UPS hi central sorkar hnuaia hnathawk 23 lakh te chuan an hmang nghal thei dawn a, state sorkar in a awm ve a nih chuan 90 lakh chuangin an hmang thei tura ngaih a ni bawk.