Law Commssion chuan ‘a pawimawh em avangin’ Uniform Civil Code (UCC) chungchanga inrawnkhawmna thar a kalpui leh mek tan tiin Law Minister Arjun Ram Meghwal chuan Rajya Sabha hnenah a sawi.
Ziaka a chhannaah Law Minister chuan 21st Law Commission khan August 31, 2018 khan “Reform of Family Law” tihah consultation paper a tichhuak a, mahse, report theh luh a nei lo, a ti a.
“Kum li lai consultation paper siam hnuah a ral tawh a, 22nd Law Commission chuan June 14, 2023 atang khan mipui nawlpui leh sakhaw pawl te ngaihdan chu uniform civil code chungchangah hian a la tan a ni,” tiin a sawi a.
Meghwal chuan law panel chuan inrawnkhawmna a la neih mek chauh avangin UCC kalpui dan tur emaw kalhmang chu tun dinhmunah engmah siam a la ni lo tiin a sawi bawk.
22nd Law Commission chuan June 14 atang khan stakeholder hrang hrang – mipui nawlpui, sakhaw pawlte ngaihdan a dil tan mek a. UCC hi politics thil taka sensitive deuh mai a nih angin fimkhur taka kalpui niin heng pawl hrang hrang te ngaihdan hi July 15 a theh lut tura tih chu July 28-ah pawhsei a ni bawk.
UCC hi India mi tin te tana common personal law sakhuana behchhan lova neihtir tumna a ni a Personal law tih hian inheritance, adoption leh succession tih ang te chu common code-in a tuam tura ngaih a ni a. Tun dinhmunah chuan sakhaw hrang hrang ten personal law hrang neiin chumi ang chuan thil kalpui a ni.
Uniform Civil Code hman hi BJP te election manifesto-a tel niin BJP rorelna Uttarakhand-ah chuan common code siam tur din tawh niin draf law an siam vat tura ngaih a ni.
UCC kaihhnawih-ah hian zawhna dang MP te chuan Minister zawtin sorkar chuan court kal dan chu English atangin Hindi-a thlakin mipui nawlpuiin an hriatthiam theih nana kalpui tum a ni em tih chu Law Minister chuan chutiang a awm lo tiin a chhang thung.
Uniform Civil Code hi Opposition te chuan an duh lo hle thung a. Hei mai bakah hian India ram hmun hrang hrang atangin party hrang hrang te chuan an duh lohzia Union government hnenah ziakin an thlen tawh a, sakhaw pawl hrang hrang te pawhin an duh loh thu an thlen tawh bawk.
Centre-in UCC chungchang inrawnkhawmna kalpui mek
