Chief electoral officer (CEO) Mizoram Madhup Vyas kaihhruai CEO Team chuan Thawhlehni tlai khan MLA inthlanpui neih zawh taka thlantlinte, thlantlin an nihna constituency leh an chuhna political party chuanna Election Commission tihchhuah ‘Due-Constitution Notification’ chu General Legislative Assembly thar din a nih theih nan ECI aiawhin Mizoram larsap Dr Hari Babu Kambhampati hnenah an hlan.
Larsap chuan boruak muanawm tak hnuaia felfai taka inthlanpui zawhfel a ni leh dan leh thupek tha taka kenkawha zawm a ni chu lawmawm a tih thu a sawi a. State dangte tana entawntlaka mawi leh hmuh nuam a ni, tiin, chhawmnun zel a pawimawh tih a sawi. Hlawhtling taka inthlan buatsaih a nih theih nana hma latu CEO leh a thawhpuite bakah inthlan kaihhnawiha theihtawp chhuahtute hmalakna fakawm a tih thu a sawi bawk.
CEO chuan a team-te inhmelhriat tirin inthlan buatsaih kawnga hmalak dan larsap hi a hrilh a ni.
CEO Team-ah hian addl. CEO-I H Lianzela, addl. CEO-II Amol Srivastava, joint CEO James Lalnunmawia, deputy CEO-I R Vanrengpuia, deputy CEO-II Henry C Lalrawnkima leh ACEO Vanlalhmachhuana te an tel a ni.
MLA inthlanpui neih zawh taka vote tla hi December 4 khan chhiar zawh a ni a. Mizoram puma vote tla zat (EVM a vote tla leh postal ballot hmanga vote tla belhkhawm) chu za zelah 82.26 a ni a. 2018 inthlanpuia vote tla zat zaa 81.11 a khum a ni.
CEO-in larsap hnenah hlan
![](https://theaizawlpost.org/wp-content/uploads/1-235-1024x682.jpg)